Reinu Unidu Sei Loke Embaixada iha Timor-Leste

Hatutan.com, (01 Marsu 2024), Díli- Governu Reinu Unidu sei loke  Embaixada Británika iha Timor-Leste nu’udar demonstrasaun klaru bá kompromisu Reinu Unidu nian atu hakle’an no hametin relasaun bilaterál entre nasaun rua.

Lee Mós: Reinu Unidu Kompromete Apoiu TL Nia Dezenvolvimentu Ekonomia, Saúde no Nutrisaun

Ministra Reinu  Unidu bá Indo-Pasífiku, Anne-Marie Trevelyan, kontente tebes  mai vizita Timor-Leste bá dala-rua nian tanba ba dala-ida ne’e  hanesan oportunidade di’ak atu halo kolaborasaun di’ak iha relasaun bilaterál entre Timor-Leste ho Reinu Unidu.

Área sira ne’ebé sei estabelese kooperasaun ho Timor-Leste mak hanesan saúde, edukasaun, nutrisaun no mós dezenvolvimentu ho ekonomia.

PM Xanana Gusmão simu audénsia ho Ministra Reinu Unidu bá Indo-Pasífiku, Anne-Marie Trevelyan iha Pálasiu Governu, Sesta (01/03/2024). Foto/Elio dos Santos da Costa

“Ha’u kontente tebes hasoru Primeiru-Ministru Kay Rala Xanana Gusmão no kontente mós atu anunsia katak sei loke embaixada foun Británika nian iha Timor, no ida-ne’e demonstra kompromisu boot Governu Reinu Unidu nian mai  Timor-Leste,” Ministra Reinu  Unidu ba Indo-Pasífiku, Anne-Marie Trevelyan hateten bá jornalista sira  hafoin hasoru malu ho PM Xanana iha Palásiu Governu, Sesta (01/03/2024).

Nia hatutan loke embaixada Británika iha Dili sei marka hanesan faze importante ida baáiha relasaun bilaterál nasaun rua nian. Timor-Leste no Reinu Unidu sai nasaun rua ne’ebé belun boot no Reinu Unidu sei kontinua fó apoiu ba prosesu dezenvolvimentu iha Timor-Leste.

Primeiru-Ministru Kay Rala Xanana Gusmão hateten atu hare ba Indo-Pasífiku ne’e dunik nia mai tiha ona iha Outubru, tinan kotuk, no ohin mai tan dala ida atu espresa de’it solidariedade mai Timor-Leste, no atu ko’alia mos kona-bá nia servisu.

Molok ne’e Prezidente Repúblika, José Ramos-Horta halo vizita  Estadu bá  Reinu Unidu hodi hasoru mós Ministru Relasaun Externa Reinu Unidu nian, ne’ebé iha asuntu balun ne’ebé sira ajuda Timor-Leste ne’ebé ohin ne’e ko’alia asuntu barak kona-ba mundu, rejiaun ninian, Pasífiku no Timor-Leste.

“Ha’u agradese tebe-tebes ba Reinu Unidu tamba  Timoroan  besik 4.000 servisu iha Reinu Unidu. Agradese tebe-tebes tamba Timoroan sira ba ho pasaporte portugés maibé simu hanesan Timoroan,” Xanana Gusmão hateten.

Jornalista : Vito Salvadór