Bollore Fa’an Ona Asaun Timor Port Bá MSC

Hatutan.com, (06 Marsu 2024), Díli—Daudaun ne’e Timor Port la’ós ona parte ida hosi kompañia Bollore group tanba iha tinan ida liubá fa’an tiha ona asaun (share) bá Mediterranian Shipping Company (MSC) ne’ebé nia baze iha Italia.

Lee Mós: Portu Tibar, “Iluzaun” Sai Realidade Nu’udár Portu Dahuluk Modernu iha Timor-Leste

Portu Baia Tibar, Díli, Timor-Leste. Foto/Dok

Iha tinan 2016  Governu Timor-Leste asina akordu konsesaun ho kompañia Bollore group bá operasaun barku kargu importaasaun no exportasaun, involvimentu rekursu umanu no jestaun to’o tinan  30.

“Iha inísiu Timor Port ho Bollore ne’e grupu ida-de’it tanba Timor Port mós tutela bá iha Bollore African Logistics, maibé dezde tinan ida liubá Bollore African Logistics fa’an ona asaun (share) bá  Mediterranian Shipping Company (MSC) entaun Bollore ho Timor Port la hamutuk ona,” Diretór ezekutivu Timor Port S.A,  Rafael Ribeiro hateten hodi responde Hatutan.com iha nia servisu fatin, Portu Baía Tibar, Kuarta (06/03/2024).

Nia informa Bollore fa’an asaun Timor Port bá MSC tanba razaun negósiu (business). Nune’e, hafoin MSC sosa tiha kompañia Bollore African Logistics  muda fali naran African Global Logistics.

“Agora Bollore ketak ona, kompañia Bollore nafatin,  Timor Port ketak ona iha fali African Global Logistic nia parte, ne’ebé tutela bá  Mediterranian Shipping Company ( MSC),” Rafael Ribeiro hateten.

Ho fa’an tiha asaun Timor Port ne’e, maka  Bollore nu’udár kompañia lojístika ne’ebé servisu halo atendimentu bá ró, la’ós ona operasaun bá portu, Enkuantu Timor Port mak halo operasaun bá Portu Baia Tibar ne’ebé tuir kontratu durante tinan 30 hahú husi tinan 2018.

Jornalista Hatutan.com, Leopoldina de Carvalho entrevista Diretór Ezekutivu Timor Port S.A, Rafael Ribeiro iha Portu Baia Tibar, Kuarta (06/03/2024). Foto/Tome da Silva

Mediterranean Shipping Company (MSC) nu’udár kompañia ida baze iha Italia enkuantu Bollore Nna baze iha Fransa.

Iha loron 03 fulan-Juñu 2016, Ministeriu Obras Publika (MOP) tempu ne’ebá Ministru Gastão de Sousa atuál Ministru Planu Investimentu  Estratéjiku (MPIE)  asina akordu ka kontratu ho Empreza Bollore group bá konstrusaun Portu Baia Tibar ho tipu akordu parseria públiku privadu (PPP) entre Governu ho Empreza ho durasaun kontratu validu to’o tinan-30.

Iha akordu ne’e, Governu kria parseiru ho empreza bá kustu investimentu (publiku-privadu), inklui atividade prontuáriu nian. Governu investe fundu imprestimu hosi  Banku Dezenvolvimentu Aziátiku  (ADB, sigla Ingles) no foti hosi Fundu Petroliferu Orsamentu Jerál Estadu (OJE) 2016-2018 hamutuk millaun $360 no millaun $130 mai huoi empreza Bollore Group. Total fundu despezas bá Portu Tibar millaun $490.

Portu Baia Tibar nia kapasidade bá akumula kontentór  kada tinan tokon-ida (1), alvu mediu kada tinan akumula kontentór 870.000.

Jornalista: Leopoldina de Carvalho