Hatutan.com, (06 Marsu 2024), Díli—Ró rua ho naran Seabourn Soujor no Seabourn Odyssey hosi Austrália atraka iha Portu Díli ho turista 1.000-resin mai vizita Timor-Leste (TL).
Diretora Nasionál Marketing Turizmu no Relasaun Internasionál, Ivaniaros Ximenes Gonçalves.
Diretora Nasionál Marketing Turizmu no Relasaun Internasionál, Ivaniaros Ximenes Gonçalves hateten, Ro rua ne’ebé atraka iha Portu Dili, atu kontinua fali viazen bá Kupang Indonézia.
“Ro rua ne’e sempre lori turista sira la’o. Tanba ne’e, sira husu atu atraka iha portu Dili hodi nune’e turista sira bele tun mai hala’o vizita ita nia rai,” Ivaniaros Ximenes Gonçalves hateten iha portu Dili, Kuarta (06/03/2024).
Advertisement
Liga ho kondisaun iha portu Dili, diretora ne’e hato’o ona preokupasaun balun bá Ministériu Turizmu atu bele tau konsoderasaun.
Ró rua ho naran Seabourn Soujor no Seabourn Odyssey hosi Austrália atraka iha Portu Díli ho turista 1.000-resin mai vizita Timor-Leste (TL), Kuarta (06/03/2024). Foto: Tomé da Silva.
“Ita hato’o ona atu Ministériu bele tau iha konsiderasaun liuliu hadi’a fasilidade balun iha posrtu Díli nune’e bele fasilita liu tán hodi bele atende bainaka sira ho di’ak no sira bele senti konfortável,” nia hateten.
Nia mós informa katak, parte relevante sira agora daudaun iha hela planu rehabilitasaun bá portu Dili, loke ona tenderizasaun ba kompañia sira atu konkorre bá projetu rehabilitasaun ne’e.
Informasaun ne’ebé iha katak, turista sira ne’ebé mai ho ró rua ne’e hamutuk na’in 1.000-resin no hala’o vizita durante oras 8 iha Díli, hafoin kontinua viazen bá Kupang.
Durante oras 8 turista sira hala’o vizita bá iha Muzéu Rezisténsia, Centro Nacional Chega!, Cristo Rei, Dolok-oan, Tais Market no fatin seluk tán hanesan Timor Plaza no sees hosi Dili mak hanesan memorial Dare no mós Global Cafe Gleno.
Vizita ida-ne’e servisu hamutuk entre empreza Agency viagem sira mak halo kontaktu ho parte ró no Tour Operator kontaktu turista sira no hetan apoiu hosi Governu Timor-Leste liu hosi Ministériu Turizmu hodi fasilita transporte.
Advertisement
Turista sira ne’e mai hosi nasaun oioin hanesan Amérika, Itália, Japaun no seluk tán.