Deskonfia Halo Manifestasaun Ilegál, MP Promove Krime Dezobediénsia bá Arguidu Na’in-10

Hatutan.com, (07 Marsu 2024), Díli– Ministériu Públiku (MP) liuhosi Prokuradór Osório de Deus, promove kríme dezobediénsia ba arguidu na’in-10 ne’ebé deskonfia halo manifestasaun ilegál hasoru Ministériu Edukasaun (ME), iha edifísiu Vila-verde, Tersa (05/03/2024).

Professores kontratadu sira ne’ebé deskonfia hala’o manifestasaun ilegál, mai tuir primeiru interrogatóriu iha Tribunál Judisiál Primeira Instánsia Dili (TJPID), Kinta (07/03/2024). Foto: Lazaro Pereira Quefi.

Arguidu sira ho naran inisiál, NDS, LSB, SG, RDC, GF, MM, JMPDR, ADCF, JB no  LDS, momentu iha manifestasaun ne’e komete hela krime dezobediénsia hasoru Ministériu Edukasaun.

Lee Mós: Eis-Profesór Kontratadu Sira Husu PN Tau Matan bá Sira-Nia Problema

Defeza bá arguidu sira, advogadu privadu Octavio Cardoso hateten, iha prossesu sumáriu ne’e arguidu  balun konfesa no arguidu balun hili direitu nonok ba kazu ne’e.

“Iha prossesu sumáriu ne’e, Ministériu Públiku promove krime dezobediénsia ba arguidu sira iha artigu 193 ne’ebé previstu iha Kódigu Penál,” Advogadu privadu, Octavio Cardoso hateten iha Tribunál Judisiál Primeira Instánsia Dili (TJPID), Kinta (07/03/2024).

Tuir Defeza, iha prossesu sumáriu ne’e seidauk iha desizaun ida tanba arguidu sira barak, nune’e Tribunál presiza analiza didi’ak lai arguidu sira hodi ba prossesu, tanba ne’e Tribunál deside adi’a  desizaun bá fali loron 12 fulan Marsu 2024, tuku 11:00 otl.

Prossesu sumáriu ne’e, alegasaun finál hosi Ministeriu Públiku husu Tribunál atu deside tuir Tribunál nia haree, tanba Ministériu Públiku intende katak arguidu sira iha duni indísiu ba violasaun Lei manifestasaun numeru 5/2006, nune’e bainhira manifestante sira atu halo asaun protestu tenke do’ok hosi reparatizasaun publiku kuaze metro 100 no asegura mos hosi seguransa.

Alende ne’e parte Defeza mós husu ba Tribunál atu absolve arguidu sira, tanba Defeza intende katak la sufisiente faktus bá professores sira atu prienxe krime ne’ebé Ministériu Públiku imputa ba sira, no husu Tribunál liberta imediatu arguidu hosi sela detensaun.

Tribunal intende hela no liberta ona arguidu sira hosi sela detensaun no haruka arguidu sira fila-fali ba ida-idak nia uma, antes juis turnu hatudu despaixu ikus ba prossesu sumáriu ne’e iha 12 Marsu 2024, iha oras 11:00 dadersan.

Ih prossesu sumáriu ne’e rasik, prezide hosi juis turnu, Ercilia de Jesus, Ministériu Públiku reprezenta hosi Prokuradór Osorio de Deus, no arguidu sira hetan asisténsia legál hosi advogadu privadu Octavio Cardoso ho Marino da Cruz.

Jornalista Estajiáriu:  Lázaro Pereira Quefi