Ró Rua Tula Turista 1.000-resin, Oferese $18.240 bá TL

Hatutan.com, (07 Marsu 2024), Díli—Ró Seabourn Soujor no Seabourn Odyssey hosi Austrália ne’ebé tula turista na’in 1.000-resin no atraka iha Portu Díli iha kuarta (07/03/2024), selu taxa bá Diresaun Jerál Servisu Migrasaun hamutuk $18.240.

Turista 1.000-resin hosi Austrália atraka iha Portu Díli, Kuarta (07/03/2024). Foto: Elio dos Santos da Costa.

Diretora Jerál Servisu Migrasaun, Inspetora Xefi Polísia, Adelaide da Rosa informa, diresaun ne’e koloka membru na’in 25 lidera hosi Xefi Seitór Fronteira, Inspetór Polísia, Agostinho da Costa hodi halo atendimentu bá turista hosi kontinente, Amérika, Europa, Afrika, no Azia ho totál pasajeiru ho Crew na’in 1.463 ne’ebé hala’o vizita mai Timor.

Lee Mós: Ró Rua Hosi Austrália Tula Turista 1.000-resin Vizita TL

Turista hirak ne’e mai ho objetivu atu haree fatin turístiku, sítiu relijiozu no fatin istóriku iha Timor-Leste nian liu-liu iha Kapitál Dili.

“Turista ne’ebé tun mai rai maran hamutuk ema na’in 637, na’in 608 mak selu visa kada ema $30, ema na’in 29 free visa tanba mai hosi Uniaun Europeia no Indonézia. Entaun, totál taxa ne’ebé rekolla hamutuk $18.240 no sira hala’o vizita bá fatin turístiku iha Dili mak hanesan, Estatua Cristo Rei, Dare Memoriál, muzeu rezisténsia, Centro Nacional Chega iha antigu Komarka Balide, Tais Market, Semitériu Santa Cruz no ba liu haree plantasaun café iha Gleno-Ermera,” Hatutan.com sita deklarasaun Inspetora Xefi Polísia, Adelaide da Rosa  iha komunikadu.

Ró rua ne’ebé tula turista atraka iha Portu Díli ne’e hala’o vizita durante oras ualu nia laran iha Timor-Leste, no iha lorokaraik kontinua viazen bá Kupang Indonézia.

Jornalista Estajiáriu: Rogerio Pereira Carceres