Polísia Entrega Motór 141 bá Patrimóniu Estadu Halo Leilaun

Hatutan.com, (11 Marsu 2024), Díli-Polisia Nasionál Timor-Leste (PNTL) Munisípiu Díli, Segunda (11/03/2024), entrega motór 141 bá Diresaun Jerál Jestaun no Patrimóniu Estadu (DJJPE), Ministériu Finansas, hodi halo no bele halo  konkursu leilaun públiku ka bele mós enkimaña fali bá instituisaun Estadu sira seluk hodi utiliza tuir nesesidade.

Lee Mós: Kazu Na’ok Motór, Forsa Konjunta Kaer-tán Supeitu 11 Inklui Na’in bá Ofisina Modifikadór

Polísia entrega ona motór hirak-ne’e bá Diresaun Jerál Jestaun no Patrimóniu Estadu (DJJPE), Segunda (11/03/2024). Foto/Elio dos Santos da Costa

Motór 141 ne’e, Polísia Munisípiu Díli halo apreensaun liuhosi opresaun, inklu motór balun hetan asidente, maibé balun tinan barak nia laran ona na’in la bá foti no halo reklasasun administrativu atu foti.

Komandante PNTL Munisípiu Díli, Superintendente Xefe Orlando Gomes, informa vidénsia motór sira-ne’e estasiona kleur loos iha arredór Komandu PNTL Munisípiu Díli tanba preendidu hosi infratór sira durante atividade auto-stop, passa-revista no operasaun iha kapitál nasaun.

Motór hirak ne’e, balu prende kedas iha tinan 2021 to’o 2023, hamutuk 66, no besik tinan 10 liu ona, estasiona de’it iha komandu Polísia Díli, no na’in ka infratór sira lakohi rekoñese atu bá foti fila-fali.

Tuir Dekretu-Lei Númeru 6/2003, katak prazu hosi evidénsia ne’ebé polísia prende ka veíkulu sira ne’ebé polísia prende, labele rai kleur iha resintu komandu PNTL sira liuhosi loron 90. Bainhira liu ona loron 90 nia laran, na’in bá transporte hirak ne’e lakohi bá foti, komandu PNTL sira iha kompeténsia tuir lei, deside hodi entrega bá Patrimóniu Estadu.

Iha biban hanesan, DJJPE liuhosi Diretora Nasionál bá Inventáriu no Jestaun ba Bens ho Moveis, Timótea P. Marques, hatutan, tuir prosedimentu ne’ebé maka iha, katak, hafoin simu tiha evidénsia motorizada hirak ne’e, Patrimóniu Estadu mak sei jere sasán sira ne’e, liu-liu oinsá mak bele halo tuir dekretu-lei númeru 32/2011, atu prosesa motór preendidu sira ne’e nia prosesu sira bá oin.

“Oinsá mak atu halo konkursu ho modalidade ne’ebé mak iha. Entermus de téknika, ami korodena di’ak tebes, halo ona inspesaun bá motór sira ne’e, depois entrega, ekipa sira sei halo rekollamentu, hafoin maka prosede bá prosesu sira tuir mai,” diretóra Timótea, hateten.

Jornalista: Rogério Pereira Cárceres