Deskonfia Halo Manifestasaun Ilegál, Tribunál Absolve Arguidu Na’in-10

Hatutan.com, (12 Marsu 2024), Díli—Tribunál Judisiál Primeira Instánsia Díli (TJPID), deside absolve krime akuzadu bá arguidu na’in-10 ne’eb’e deskonfia halo manifestasaun ilegál hasoru Ministériu Edukasaun (ME), iha edifísiu Vila-verde, Tersa (05/03/2024).

Professores kontratadu sira ne’ebé deskonfia hala’o manifestasaun ielgál, mai tuir primeiru interrogatóriu iha Tribunál Judisiál Primeira Instánsia Dili (TJPID), Kinta (07/03/2024). Foto: Lazaro Pereira Quefi.

Defeza hosi arguidu sira, advogadu privadu, Octávio Cardoso hateten, iha prossesu julgamentu  sumáriu ida-ne’e, iha despaixu Tribunál nian, deside absolve krime ne’ebé Ministériu Públiku imputa bá arguidu sira.

Lee Mós: Deskonfia Halo Manifestasaun Ilegál, MP Promove Krime Dezobediénsia bá Arguidu Na’in-10

Iha desizaun dia 12/03/2024 oras kalan, provizorimente Tribunál deside absolve hosi krime ne’ebé mak Ministériu Públiku akuza bá sira, hanesan autór no koautór ba krime dezobediénsia ne’ebé prevee iha artigu 244 Kódigu Penál.

“Hosi provas no dokumentais ho testemuñu ne’ebé mak sira aprezenta no deklarasaun arguidu na’in 10 nian, Tribunál intende katak, la sufisente ba faktus atu kondena sira,” Octavio Cardoso hateten iha TJPID.

Ho razaun ida-ne’e maka Tribunál absolve arguidu na’in 10 ne’e kompostu hosi professores na’in-8 ho ativista na’in-2.

“Nune’e, desizaun ohin Tribunál absolve akuzasaun hosi Ministériu Públiku,” nia subliña.

Jornalista Estajiáriu: Lázaro Pereira Quefi