Governu Tenke Halo Auditoria bá Ponte Becusse

Hatutan.com, (12 Marsu 2024), Díli—Reprezentante povu iha Parlamentu Nasionál (PN) husu Governu halo auditóriu bá ponte Becusi ne’ebé antes ne’e Governu anteriór sobu no prossesu konstrusaun to’o iha ne’ebé ona.

Ekipamentu pezadu sira sobu ponte Becusse iha tempu ne’ebá maibé seidauk harii fali ponte foun no utiliza hela ponte provizóriu. Foto/Dok.Hatutan

“Ha’u husu Governu atuál atu halo auditoria, deskreve klaru razaun no motivu bá destruisaun ponte ne’e. Husu mós atu loke prossesu investigasaun kona-bá matéria ne’e,” deputada bankada CNRT, Cedelizia Faria dos Santos levanta kestaun ne’e iha plenária, Tersa (12/03/2024).

Lee Mós: Governu Foun Mak Bele Rezolve Ponte Becusse

Deputada ne’e husu atu haree razaun bá destruisaun ponte ne’e no husu mós atu hahú inisiativa foun hosi IX Governu hodi bele estabelese planu rekonstrusaun foun no evita desizaun partisipativu ne’ebé ignora matéria téknika hosi kualkér Governu iha future.

Nia mós ezije tenke loke duni prossesu atu hatene razaun fundamentál kona-bá ponte ne’ebé sobu iha Oitavu Governu maibé to’o agora seidauk hadi’a.

“Aproveita oportunidade atu husu informasaun kona-bá ponte Becusi ne’ebé destrui hosi Ministru Obras Publika nian hosi Oitavu Governu, ita hotu haree katak ponte ne’e ponte ne’ebé liga ho estrada ne’ebé sai bá semitériu  Becusi, maibé Governu iha Orsamentu Jerál Estadu 2024 nian la inklui hodi aloka no laiha planu atu konstrui ponte ne’e.

Hatán kona-bá preokupasaun ne’e Vise-Ministru Asuntu Parlamentár, Adérito Hugo da Costa hateten, assuntu ponte Becusi ne’e IX Governu liu hosi Ministériu Obras Públika (MOP) tau hela iha planu, nune’e sei halo kontinuasaun konstrusaun ponte foun nian.

“MOP halo ona planu kona-bá situasaun ponte Becusi atu fó kontinuasaun bá planu konstrusaun foun,” nia hateten iha plenária seksaun Portugués.

Vise-Ministru Asuntu Parlamentár ne’e haktuir katak, sei laiha kulpa bá ema seluk, Governu sei kontinua hodi tau atensaun bá ponte Becusi atu tulun movimentu sidadaun sira iha kapitál Díli.

Jornalista Estajiária: Zita Menezes