CNRT-FRETILIN “Hakarak Trava” Servisu CAC

Hatutan.com, (19 Marsu 2024), Díli— Bankada KHUNTO iha Parlamentu Nasionál (PN) preokupa no konsidera bankada boot rua hanesan CNRT ho FRETILIN mak hakarak atu trava servisu Comissão Anti Corrupção (CAC), nune’e to’o agora laiha entendimentu ruma bá eleisaun komissáriu foun.

Deputadu bankada KHUNTO, Luis Roberto. Foto: Zita Menezes.

Situasaun ne’e KHUNTO haree katak, sei bele hamosu risku no haburas korrupsaun iha nasaun Timor-Leste (TL).

Lee Mós: FRETILIN Husu Altera Uluk Lei CAC Hafoin Avansa bá Eleisaun Komisáriu Foun

Preokupasaun ne’e hato’o direta hosi deputadu bankada KHUNTO, Luis Roberto iha plenária, Tersa (19/03/2024).

“Tanba saida mak iha Parlamentu Nasionál ida-ne’e, bá bankada hotu-hotu liuliu bankada CNRT ho FRETILIN laiha seriedade no kapasidade hodi hili komisáriu CAC. Ho situasaun sira-ne’e, tanba iha interese interna entre partidu polítiku sira hodi trava servisu CAC nian,” nia hateten iha deklarasaun polítika.

Tanba ne’e, nia husu bá Governu no Parlamentu Nasionál atu konsidera servisu CAC nian no tenke iha espiritu nasionalizmu, sentidu pertense bá rai ne’e, bankada hotu-hotu tenke mai ho hanoin ida hodi halo eleisaun bá komisáriu CAC.

Kona-bá preokupasaun ne’e, Vise-Ministru Asuntu Parlamentár, Adérito da Costa Hugo hateten, aban iha reuniaun Konsellu Ministru (KM) sei adianta mós pontu situasaun ida ne’e atu bele konsidera.

“Ita sei adianta hodi haree oinsa fó solusaun bá funsionamentu normal CAC nian, liuliu tenke prienxe mamuk ida-ne’e,” Adérito Hugo da Costa hateten.

Jornalista Estajiária: Zita Menezes