Polítika
PN Levanta Preokupasaun Povu Kona-bá Folin Foos Kontinua Sa’e
Hatutan.com, (19 Marsu 2024), Díli—Parlamentu Nasionál (PN) kontinua preokupa no levanta preokupasaun povu liu liu kona-bá folin foos ne’ebé sa’e bá bebeik to’o ohin loron.
Deputada Helena Martins hosi bankada FRETILIN konsidera subsídiu ne’ebé Governu oferese bá empreza importadór foos ne’e laiha rezultadu tanba povu iha área rurál maioria la sente no mós folin foos kontinua sa’e to’o ohin loron.
Lee Mós: Governu ho Kompañia Importadór Lima Kontinua Esforsu Normaliza Folin Fos
Helena Martins hateten, presu sasan iha rai laran liuliu presu foos agora daudaun iha Díli balun fa’an ho folin $19.50 kada saka no to’o iha munisípiu tenke fa’an ho presu $22, tanba ne’e mak Governu tenke halo kontrolu ida másimu.
“Uluk dehan taxa ma kaas liu, maibé taxa hatuun tiha ona, agora atu esplika tán saida bá ita nia povu no konsumidór sira. Ita atu bá esplika mudansa klimátika ne’e mak presu foos sa’e fali ka oinsa,” deputada Helena Martins hateten iha intervensaun plenária, Tersa (19/03/2024).
Tanba ne’e, nia husu Governu tenke halo esklaresimentu ida kle’an iha fatin hotu-hotu atu konvense konsumidór sira liuliu povu ne’ebé mak sosa ho kbiit ekonomia la natón.
Iha fatin hanesan, deputada Cristina Yuri Rebelo reforsa tán katak, foin daudaun Governu kontrata no fó ona subsídiu bá kompañia lima atu hamenus presu foos iha merkadu maibé realidade la akontese.
“Ita hotu akompaña katak ida-ne’e la akontese, tanba iha fatin balun de’it mak senti no la’ós komunidade hotu-hotu senti,” nia hateten.
Nune’e mós deputadu bankada CNRT, José Virgilio haktuir katak, subsídiu ne’ebé Governu fó ne’e tenki identifika ema hira no ema ne’ebé mak kbiit laiha no osan oitoan ne’e mak sosa.
Tanba ne’e nia mós fiar katak, Governu sei servisu makaas atu haree situasaun ne’e tanba realidade iha área rurál povu enfrenta duni problema foos folin sa’e.
Kona-bá preokupasaun hirak ne’e, Vise-Ministru Asuntu Parlamentár, Adérito da Costa Hugo promete sei hato’o bá Ministériu relevante sira hodi buka solusaun.
Jornalista Estajiária: Zita Menezes