Kazu José Bernardo Nia Mate, Autoridade Judisiál Halo Inspesaun Bá Lokál Krime

Hatutan.com, (20 Marsu 2024), Díli -Autoridade judisiál sira, kompostu hosi  Tribunal Judisiál Primera Instánsia Díli (TJPID) liu hosi Juiz koletivu Alvaro Maria, Juiz José Gonçalves ho Juiza Jumiati Freitas no Ministériu Públiku reprezenta hosi Prokuradór Adérito Tilman,  inklui Defensor Públiku Eustáquio Guterres, Kuarta 20 fulan-Marsu 2024, halo inspesaun bá lokál krime (sela polísia Munisípiu Díli)  kona-bá kazu José Bernardo  Soares nia mate iha sela laran iha tinan 2022.

Lee Mós: Kazu José Bernardo Soares Mate iha Sela Polísia, Arguidu Deklara Laiha Koñesimentu

Matebian José Bernardo Soares. Foto/Ilustrasaun

José Bernardo Soares mate iha sela laran polísia Munisípiu Díli nian ho kondisaun tali iha kakorok (atu hanesan ema tara-aan) ne’ebé Ministériu Públiku rasik konstitui ona arguido na’in-tolu (3) nu’udár membru PNTL.

Liuhosi audiénsia julgamentu iha TJPID, Kuarta (20/03/2024), parte Defeza arguido sira  nian  Defensór Públiku Eustáquio Guterres solisita bá Tribunál liu hosi Juiz koletivu ne’ebé ka’er kazu José Bernardo nian atu Tribunál halo inspesaun bá lokál krime liuliu iha sela detensaun Komandu PNTL Díli ne’ebé vítima hakotu nia iis ho kondisaun tali iha kakorok.

Tribunál aseita ho pedidu solisitasaun ne’e hosi parte defeza  nian no Tribunál bá halo kedan inspesaun iha lokál krime iha sela Komandu PNTL Munisípiu Díli.

Eustáquio Guterres hateten razaun defeza solisita bá iha Tribunál hodi halo inspesaun bá lokál krime tanba mosu pergunta barak  no dúvida oioin kona-bá fatin akontesimentu ne’e liuliu iha sela Komandu PNTL Munisípiu Díli ne’ebé momentu sai fatin ba detensaun bá matebian José Bernardo  Soares iha momentu ne’ebá.

“Pergunta balu mosu iha dúvida uitoan kona-ba lokál ne’e, tanba ne’e maka defeza husu ba Tribunál hodi halo inspesaun ba lokál  krime, atu Tribunál rasik mós bele haree loloos kona-bá lokál krime ne’e,” Eustáquio Guterres hateten bá jornalista sira hafoin akompaña Tribunál halo inspesaun bá lokál  krime iha sela Komandu PNTL Munisipiu Díli.

Tribunál ho Prokuradór no mós defeza sira haree rasik fatin akontesimentu ne’e, nune’e arguido mós marka prezensa hodi parte sira husu kedan pergunta bá arguido, hodi responde kona-ba dúvida hirak ne’ebé Tribunál iha.

Nia hatutan, hosi inspesaun ne’e hatudu katak ba defeza la iha ona dúvida ruma atu hamosu tán pergunta bá iha arguido sira.

Hosi inspesaun ne’e, Eustáquio Guterres, afirma la’ós ikus ona, maibé atu responde de’it dúvida balun no Tribunál sei marka fali loron balu tuir mai hodi rona sasin sira.

Jornalista Estajiáriu:  Lazaro Pereira Quefi