Polítika
20-21 Abríl, Kongresu Nasionál Partidu KHUNTO Bá Da-III
Hatutan.com, (21 Marsu 2024), Díli- Partidu Kmanek Haburas Unidade Nasionál Timoroan (KHUNTO) iha loron 20 to’o loron 21 fulan-Abríl, tinan ne’e, sei realiza kongresu nasionál bá da-III hodi halo reestruturasaun no prepara estratéjika polítika partidu hodi enfrenta dezafiu sira iha futuru.
Lee Mós: KHUNTO Apoiu Laiha Rezerva Bá IX Governu Konstitusionál
Kandidata PR 2022-2027, Armanda Berta dos Santos akompaña husi Konselleiru Másimu Partidu KHUNTO, José dos Santos “Naimori” ensera kampaña iha Kampu Alor, Dili, 16 Marsu 2022. Foto/Dok.Hatutan.com
Konselleiru Másimu Partidu KHUNTO, José dos Santos Naimori Bucar, Kinta (21/03/2024), informa estrutura komisaun polítika nasionál partidu KHUNTO nian husu ona hanoin ruma hosi Prezidente Repúblika (PR), José Ramos-Horta, relasiona kontribuisaun partidu polítiku sira-nian bá harii pás no kria unidade ida entre polítiku sira.
“Nu’udar polítiku tenke kria pás, la’ós de’it hanoin ita-nia ambisaun partidu nian, maibé tenke iha sentidu Estadu hodi kontribui bá rai ne’e nia di’ak,” José dos Santos Naimori Bucar hateten bá jornalista sira hafoin sorumutuk ho Prezidente Repúblika, José Ramos-Horta iha Pálasiu Prezidensiál.
Prezidente Repúblika, tuir Naimori Bucar, hanesan Xefe Estadu nasaun ida ne’e nian no iha matenek no koñesimentu ne’ebé boot tebetebes no sai mós autór bá harii nasaun ida-ne’e presiza rona nia hodi hamutuk kontribui bá dezenvolvimentu nasionál.
“Ohin, ami mai mós konvida Xefe Estadu partisipa iha kongresu nasionál Partidu KHUNTO nian ne’ebé sei monu iha loron 20-21 Abríl, tinan ne’e,” nia tenik.
Naimori Bucar subliña Prezidente Repúblika mak sei bá halo abertura bá Kongresu Nasionál bá da-III partidu KHUNTO nian ne’e no fó mensajen bá iha kongresista sira hodi kontribui bá estabilidade no pás iha Timor-Leste.
Jornalista: Vito Salvadór