Desportu
Governu Kontínua Suspende Atividade GAM-GAR To’o Novembru 2024
Hatutan.com, (21 Marsu 2024), Díli– IX Governu Konstitusionál kontinua suspende atividade Grupu Arte Marsiál (GAM) no Grupo Arte Rituál (GAR) to’o fulan-Novembru 2024 no husu bá lideransa sira GAM-GAR atu iha kontrolu ida masímu bá membru sira molok reativa hikas iha Novembru nia laran.
Lee Mós: Sosiedade Sivíl Sujere Governu Investiga Abut Problema Molok Taka GAM-GAR
Organizasaun Arte Marsiál (OAM) hamutuk 18 halo deklarasaun hodi harii dame no promete sei luta ba prevensaun konflitu ho violénsia iha komunidade, durante kampaña to’o eleisaun Parlamentár, iha Ginasio Desportu Díli, Kinta (13/04/2023). Foto/Elio dos Santos da Costa.
Primeiru-Ministru Kay Rala Xanana Gusmão, Kinta (21/03/2024), bá jornalista sira hafoin enkontru semanál ho Prezidente Repúblika, José Ramos-Horta iha Palásiu Prezidensiál, informa situasaun ida ne’ebé Governu fó apresia tebetebes mak bá situasaun ne’ebé hakmatek, ho suspende atividade arte-marsiál nian ne’ebé iha fulan-Abríl 2024 atinji fulan-neen (6) ona, maibé ho situasaun balun ne’ebé akontese Governu kontinua suspende ba fulan neen tan to’o Novembru 2024.
“Ne’eduni horsehik iha Konsellu Ministru ko’alia kona-ba ida-ne’e no ko’alia to’o Komisaun Reguladór Arte-Marsiál (KRAM) fó hatene katak ho Ministériu Interiór haree katak hosi grupu hotu-hotu kontente tanba hasai rezolusaun atu suspende, maibé haree bá katak barak la konsege iha kontrollu bá membru sira fatin bá treinamentu ka ranting iha fatin-fatin no susar atu kontrolla ho ida-ne’e mak iha Konsellu Ministru, horsehik, ami kontinua nafatin suspende fulan neen tan hodi grupu hotu-hotu bele iha kontrollu bá sira-nia membru hotu-hotu. Fatin ne’ebé sira halo treinu ne’e tenke rejista tanba la’e mosu buat ruma dehan ne’e ami la hatene tanba ne’e la’ós fatin sira ne’ebé ami kontrolla,” Primeiru-Ministru Kay Rala Xanana Gusmão informa.
Xefe Governu hatutan, ko’alia nafatin ho arte-marsiál sira katak bainhira la akontese buat ida durante periódu suspensaun antes Novembru, Governu sei halo atividade kompeténsia bá sira hodi muda tiha hanoin kona-bá arte-marsiál ne’ebé atu oho-malu ka fahe-malu bá modalidade desportu ne’ebé lori benéfisiu fíziku no bele kontribui ba hakmatek.
“Ita ema barak mate bá bandeira RDTL no bá treinu arte-marsiál bá jura fali iha bandeira Indonézia, ne’e katak jerasaun foun lakon tiha ona espiritu nasionalizmu no patriótizmu,” Komandante ein-Xefe FALINTIL ne’e afirma.
Governu hasai tiha rezolusaun hodi suspende nafatin atividade GAM no GAR atu grupu hotu-hotu bele kontrolla nia ema sira ho di’ak no membru sira bele hatene halo saida tuir regra hodi nune’e kria daudauk hanoin foun hodi prepara an ba kompetisaun sira ne’ebé governu sei kria.
Grupu-arte Marsiál ne’ebé Governu konstinua suspende nia atividade mak hanesan Persaudaraan Setia Hati Terate (PSHT), Ikatan Keluarga Silat Pemuda Timor-Leste (IKS-PTL), Kmanek Oan Timor Rai-Klaran (KORK) no arte-ritual ne’ebé suspende nia atividade mak Sete-Sete (77).
Lee Mós: Taka GAM-GAR, Lei Tenke Aplika bá Ema Hotu Hanesan
Jornalista: Vito Salvadór