Hatutan.com, (21 Marsu 2024), Díli—IX Governu Konstitusionál haluha ona sidade universitária iha munisípiu Aileu tanba konsidera gasta osan barak liu, nune’e sei konsentra de’it hodi promove no dezenvolve programa politékniku sira.
Ministru Ensinu Superiór Siénsia no Kultura (MESSK), José Honorio. Foto: Elio dos Santos da Costa.
Ministru Ensinu Superiór Siénsia no Kultura (MESSK), José Honorio informa, sidade universitáriu Aileu la tama iha IX Governu nia programa no Governu sei tau prioridade hodi loke tán politékniku sira.
“Sidade universitáriu ne’e mehi ida ne’ebé ita tenki haluha ona no ita hanoin buat foun. Ita boot sira hatene osan gasta bá sidade universitáriu boot la halimar kompara ho ita loke politékniku,” José Honorio hateten hafoin halo audiénsia ho Komisaun G ne’ebé trata asuntu Edukasaun, Juventude, Sidadania no Kultura iha PN, Kinta (21/03/2024).
Advertisement
Tuir planu, IX Governu hanoin ona atu loke politékniku iha munisípiu Lautém, Manatuto no Covalima.
Relasiona ho rai afetadu sira iha Aileu, nia dehan, Governu fó ona indemizasaun no rai ne’e pertense ona bá Governu, bá futuru Governu hanoin atu halo buat seluk ruma iha rai ne’e.
Tuir ministru ne’e katak, UNTL mós iha fakukdade barak loos ona, iha Hera Fakukdade Agrikultura ho Enjeñaria no bá futuru sei loke tán Fakukdade Medisina iha Hera.