Komisaun G-PN Apresia SEKOMS

Hatutan.com, (21 Marsu 2024), Díli– Komisaun G Parlamentu Nasionál (PN) bá asuntu Edukasaun, Juventude, Sidadania no Kultura, apresia ho servisu Sekretária Estadu Komunikasaun Sosiál (SEKOMS) nian iha ámbitu ezekusaun orsamentu jerál Estadu 2023 ho orsamentu Retifikativu  nian.

Lee Mós: SEKOMS Laiha Koñesimentu Natoon bá Plájiu

Sekretáriu Estadu Komunikasaun Sosiál, Expedito “Loro” Diaz Ximenes . Foto/Elio dos Santos da Costa

Prestasaun ne’ebé Komisaun G konsidera iha avansu iha programa rua (2), mak hanesan programa diseminasaun informasaun no mós dezenvolvimentu komunikasaun sosiál  iha Timor-Leste.

“Ohin, SEKOMS hato’o kona-bá ezekusaun orsamentu jerál estadu (OJE) 2023 ne’ebé fulan neen nia laran hosi Jullu to’o 31 Dezembru 2023, ho orsamentu ne’ebé alokadu bá SEKOMS iha retifikativu hamutuk milaun $5.6 SEKOMS konsegé ezekuta 94.8%,” Sekretáriu Estadu Komunikasaun Sosiál, Expedito “Loro” Diaz Ximenes hateten bá jornalista sira hafoin halo audiénsia ho Komisaun G-PN iha PN,  Kinta (21/03/2024).

Expedito “Loro” Dias Ximenes informa, rádiu komunidade  liña oin ka frontline informasaun Governu nian bá komunidade tanba rádiu komunidade ne’e harii rasik iha suku iha aldeia ka iha postu administrativu ne’e rasik.

“Maibé durante ne’e Governu anteriór no  IX Governu nafatin fó apoiu no foin daudaun IX Governu konstitusionál liuhosi SEKOMS apoiu bá rádiu komunidade hamutuk 28 ho osan totál mill $101,” Nia hateten.

Maské iha mós atividade balu no ekipamentu ne’ebé mak sira sei presiza nune’e deputadu sira husu para SEKOMS nafatin fó atensaun bá iha fortalesimentu rádiu komunidade sira.

“Ami hateten katak IX Governu sei nafatin buka hodi kria tán rádiu komunidade foun no nafatin fortifika  rádiu komunidade ne’ebé mak iha no deputadu sira mós hein katak jornalista ho meiu komunikasaun sosiál ne’ebé oras ne’e dadaun iha nafatin fó formasaun ne’ebé ho karaktér invetigativu,” Expedito “Loro” Dias Ximenes haktuir.

Jornalista Estajiária : Zita Menezes