Sadik-Malu iha Oé-Cusse Tama To’o Díli, Polísia Kaptura Na’in-42

Hatutan.com, (21 Marsu 2024), Díli-Polísia Nasional Timor-Leste (PNTL) Munisípiu Dili, Kinta (21/03/2024), tuku 04.00 madrugada,  kaptura suspeitu na’in-42 iha Portu Díli, tanba sadik-malu hosi kedas Rejiaun Administrativa Espesiál Oé-Cusse Ambeno (RAEOA) lori tama to’o  sidade Díli.

Lee Mós: Polísia Kaptura Suspeitu Na’in-6 iha Konfrontu Mascarenhas

Suspeitu sira ne’ebé sadik-malu iha Oé-Cusse lori tama to’o Díli. Foto/Rogério Pereira Cárceres

Komandante PNTL Munisípiu Dili, Superintendente Xefe Polísia Orlando Gomes, hateten, suspeitu sira ne’e deskonfia balu mai hosi grupu estudante estájiáriu universidade privadu ida iha Díli no balu hosi Grupu Arte-Marsiál (GAM), ne’ebé hein malu iha Portu Díli suspeitu sira-ne’e PNTL Díli  kaptura iha Kinta madrugada, hale’u tuku 04.00 Otl.

“Estudante hosi universidade ida iha Díli ne’ebé mak bá estájiu iha Oé-Cusse, ne’ebé mak sira fila mai, ohin madrugada, to’o iha Portu Díli, tanba mosu problema kedas iha Oé-Cusse, ne’ebé mak sira lori mai to’o Díli,” Superintendente Xefe Polísia Orlando Gomes, informa bá jornalista sira iha nia kna’ar fatin, Kinta (21/03/2024).

PNTL liuhosi nia ekipa sekreta sira mak hanesan Servisu Informasaun Polísia (SIP) Nasionál, no membru balu mós halo kedas patrullamentu bá to’o iha Portu Díli hodi halo kedas kapturasaun hasoru suspeitu sira.

Suspeitu sira ne’ebé sadik-malu iha Oé-Cusse lori tama to’o Díli. Foto/Rogério Pereira Cárceres

“Ami mós hetan ona informasaun, liuhosi sira nian video ne’ebé mak fó sai iha média sosial, tanba ne’e maka ita hetan uluk informasaun no ami haruka kedas ekipa servisu informasaun sira, ekipa aranha mós to’o iha ne’ebá halo intervensaun no halo kedas kapturasaun bá sira na’in-42,” Orlando Gomes informa.

Suspeitu sira-ne’e balu hanesan estudante estajiáriu universidade ida iha Díli nian no balu hosi grupu arte-marsiál, tanba relasaun ho problema ne’ebé mak sira halo antes iha Oé-Cusse, nune’e sira kombina malu, grupu balu hein iha Portu Díli halo asaltu fali sira ne’ebé mak estájiu, foin fila hosi Oé-Cusse.

Jornalista: Rogério Pereira Cárceres