Projetu ne’ebé ezekuta hosi kompañia vendedór TEA International Engineering Co., Ltd ne’e ho kustu US$3,593,439.00 ne’ebé hahú implementa iha loron 06 fulan-Dezembru 2023, liuhosi serimónia hatuur fatuk-inan dahuluk hosi Ministru Obras Públika, Samuel Marçal ho Secretáriu Estadu Eletrisidade, Bee no Saneamentu, Santos Noronha.
Kustu obra US$3,593,439.00 ne’e ho naran projetu dezeñu, fornesimentu, konstrusaun sivíl, instalasaun transformadór (design, supply, civil works, installations commissioning testing of 20 MVA Transformer).
Advertisement
Informasaun ne’ebé Hatutan.com asesu hosi tékniku profisionál sira iha EDTL,E.P katak projetu ne’e nesesáriu atu bele kumpre bá pedidu hosi kliente espesiál Portu Baía Tibar hodi garante funsionamentu eletrisidade bá portu administra no jere hosi kompañia Bollore Group.
Bá Hatutan.com, Kinta (21/03/2024), iha Palásiu Governu, Ministru Obras Públika, Samuel Marçal klarifika katak, razaun instalasaun transformador ho kapasidade 20MVA ne’e atu halo upgrade bá enerjia ne’ebé oferese bá Portu Baía Tibar tanba portu persiza enerjia neébe boot bá iha makina sira iha ne’eba.
“Travo ka transformadór ne’e EDTL,E.P nia transformadór rezervadu ne’ebé sosa iha tinan hira bá kotuk, (la hatene tinan hira liubá), atu dehan rezerva mós travo rua ka tolu ne’e sira hola antes ona, tinan hira ba kotuk hola tena, la uja, rai hela foin atu uza ne’e,” Ministru Obras Públikas Samuel Marçal hateten hafoin audiénsia ho Komisaun G Parlamentu Nasionál iha PN.
Instalasaun transformadór 20MVA iha sub-estasaun EDTL,E.P Liquiça. Foto/Tome da Silva
Travo ka transformadór ne’e EDTL,E.P nian no liga ho kustu projetu US$3,593,439.00 ne’e, Samuel Marçal hateten, orsamentu ne’e bá de’it konstrusaun ho mão de obra la inklui sosa transformadór.
“Sé tau tan travo entaun nia montante bele liu hosi US$3,593,439.00,”Ministru Samuel Marçal argumenta.
Iha fatin hanesan prezidente EDTL, E.P, Paulo da Silva hateten ,alokasaun orsamentu hamutuk US$3,593,439.00 hodi responde ba Qubql, accesori, civil work, no seluk tan.
Advertisement
“Travo ne’e iha rua ida uluk harií bá iha sub estasaun uza ba nesesidades kliente sira, iha Munisípiu Liquiça rasik depois mai to’o iha Tibar enkuantu aumenta tan travo ida agora ne’e tanba nesesidade atu fornese tan enerjia bá Portu Tibar,” Paulo da Silva esklarese.
Foto/Repro
Projetu dezeñu, fornesimentu, konstrusaun sivil, instalasaun transformador ho kapasidade 20 MegaVolt Ampere (MVA) refere implementa husi kompaña TEA International Engineering Co., Ltd ho durasaun tempu fulan-ne’en (6).
Transformadór ho kapasidade 20MVA ne’e sei atende espesialmente nesesidade Portu Baía Tibar nian hodi fornese enerjia liu-husi feeder espesial rua ( Feeder 3 no Feeder 5).
Hosi sorin seluk, diretór kompañia XJh Construction Lda, ne’ebé kaer hela servisu iha lokál projetu iha Liquiça, Xiujiang Huang informa instalasaun transformadór 20MVA ne’e atinji ona 90%
“Hela de’it mak instalasaun bá liña eletrisidade, maibé hela balun deit, no ateru fatuk iha rai, fulan oin bele entrega ona bá Governu,” Xiujiang Huang, nu’udár sidadaun Xina ne’e haktuir bá Hatutan.com iha Liquiça, Sesta (22/03/2024).
Total traballadór ne’ebe servisu bá projetu instalasaun transformadór ne’e kompostu husi traballadór Xinés na’in-ualu (8) no Timoroan na’in- 10.