Enkontru SEKOMS ho CI iha Novo Turismo, Konteudu no Konseitu Balun Planu Estratéjiku SEKOMS Hanesan ho CI

Hatutan.com, (25 Marsu 2024), Díli– Sekretáriu Estadu Komunikasaun Sosiál (SEKOMS), Expedito Dias Ximenes ho nia ekipa, Segunda (25/03/2024), halo enkontru koordenasaun ho Konsellu Imprensa (CI, sigla portugés) Timor-Leste hodi diskute kona-bá kestaun plájiu ne’ebé sai ona diskusaun públiku no diskusaun iha nivel akadémiku sira.

Lee Mós: CI Konsidera SEKOMS Halo Plájiu Grave no Sei Haruka Karta Lamentasaun

Enkontru koordenasaun SEKOMS ho Ci iha novo Turismo, Segunda (25/03/2024). Foto/Elio dos Santos da Costa

Enkontru ne’ebé nu’udár pedidu hosi Prezidente CI, Otelio Ote no aseita hosi SEKOMS Expedito Loro Dias Ximenes ne’e ho nia sentidu enkontru koordenasaun ne’e hala’o iha Otél Novo Turismo ne’ebé nu’udár investimentu ida hosi Grupu Media Nasional Holding  (GMN-Holding).

Sekretáriu Estadu Komunikasaun Sosiál (SEKOMS), Expedito Dias Ximenes, iha sorumutuk koordenasaun ne’e hateten, enkontru ne’e koalia kona-bá programa no planu sira bá tinan 2024 ne’ebé parte SEKOMS no CI atu servisu hamutuk ho alvu ne’ebé hanesan katak alvu mak mídia nain sira, organizasaun jornalista sira, jornalista sira rasik, meius komunikasaun sosial no orgaun komunikasaun sosiál sira atu oinsa instituisaun Estadu rua ne’e bele iha hanoin oinsa atu dezenvolve komunikasaun sosiál iha Timor-Leste.

CI ho SEKOMS  mós ko’alia kona-ba issue balun ne’ebé lao kona-ba planu estratéjiku Konsellu Imprensa nian no SEKOMS nian ne’ebé iha interpretasaun plájiu hosi akadémiku no peritu sira. no hafoin diskusaun ne’e tekniku CI  ho SEKOMS nian haree katak CI hanesan orgaun regulador no SEKOMS representa Governu iha kompeténsia atu dezenvolve komunikasaun sosiál no ida ne’e  iha CI laiha tamba ne’e atu hateten katak objetivu hanesan, maibe kompeténsia la hanesan.

“Konteudu balun planu estratéjiku SEKOMS ho CI hanesan ne’e tanba metodolojia no iha konseitu balun hanesan tamba alvu hanesan ,maibé nia programa no atividade la hanesan tamba governu iha nia kompeténsia rasik no iha CI la iha,” jornalista senior no eis aprezentadór programa  Grande Entrevista iha GMNTV ne’e esplika bá jornalista sira.

SEKOMS klarifika katak interpretasaun públiku tuir informasaun ne’ebé sai iha mídia ida katak SEKOMS hola deit saida mak CI iha, tantu iha diskusaun ohin deklara katak la loos mésmu iha metodolojia bá hakerek planu estratéjiku ne’e hanesan, iha introdusaun balun bele hanesan tamba alvu hanesan, maibé iha konteudu ba programa no sub-program ne’e la hanesan ne’ebé ne’e la tama iha ema seluk nia interpretasaun ne’ebé hateten kopia husi fatin seluk.

Prezidente CI , Otelio Ote hateten enkontru entre CI no SEKOMS ne’e realiza tanba pedidu husi CI atu  bele buka hatene kona-bá informasaun ida ne’ebé espalla iha públiku kona-bá asuntu plajiu, ho nune’e atu responde estabelese enkontru koordenasaun entre instituisaun Estadu rua ne’e hodi bele hetan vizaun ida no liafuan ida kona-bá saida mak komprimisu bá instituisaun rua ne’e atu servisu bá dezenvolve área komunikasaun sosiál no mós dezenvolve kapasidade teknika intelektual no profesionál husi jornalista sira.

Hafoin de enkontru ne’e, Otelio Ote nu’udár ida hosi prioritáriu media Timor Post  ne’e dehan CI ho SEKOMS  iha ona armonia ida katak asuntu kona-bá plájiu  planu ne’ebé CI no SEKOMS iha ne’e asuntu ida  bolu asuntu tékniku, tekstu-tekstu sira ne’ebé tama iha definisaun tékniku bá dokumentu estadu nian bá CI no mós SEKOMS.

“Ami mós konkorda katak instituisaun rua-ne’e laiha programa prioridade hanesan no mós laiha planu no atividade hanesan signifika ida-idak ho nia tekstu iha planu estratéjiku no sei implementa nia programa sira no ida ne’ebé presija ami halo mak buka atu koopera metin. Ha’u hanoin ekipa SEKOMS halo diagnostika bá tekstu no iha SEKOMS sira uza sira-nia termu rasik kona-ba iha dunik tekstu balun hanesan, maibé la’ós tama iha konteudu prinsipál mai iha tekstu sira ne’ebé koalia asuntu jerál nian. Tamba ne’e mak ha’u mós hanoin ita mós presiza atu komprende tamba tekstu-tekstu sira ne’ebé hanesan iha tékniku hanesan iha prosesu la tama iha asuntu plajiu tuir ita nia lei komunikasaun sosiál, ne’ebé ha’u hanoin ami buka deit atu armoniza  oinsa programa prioridade sira ne’e keta hanesan karik mais ami deskobre katak la hanesan no sei la afeita ba orsamentu jerál estadu,” Otelio Ote esklarese.

CI iha mekanizmu rasik no klaru katak rezultadu hosi enkontru ne’e sei lori bá plenaria CI nian atu esplika kona-ba saida mak rezultadu husi sorumutuk ne’e.

Marka prezensa iha enkontru koordesaun ne’e Prezidente Konsellu Imprensa hamutuk ho konselleiru no diretor ezekutivu no tekniku sira CI nian no parte SEKOMS kompostu husi Sekretáriu Estadu, xefe gabinete, asesor Gabinete no tékniku sira SEKOMS nian.

Jornalista: Vito Salvadór