Ekonomia
Vizita Surpreza Vise-PM bá SERVE, I.P, Diretór Ezekutivu Laiha Fatin Tanba Partisipa Kongresu ATCPTL
Hatutan.com, (26 Marsu 2024), Díli—Vizita surpreza Vise-Primeiru-Ministru no Ministru Koordenador bá Assuntu Ekonómia no Ministru Turizmu no Ambiente, Francisco Kalbuadi Lay, bá Servisu Verifikasaun Emprezarial, Institutu Públiku (SERVE I.P), Tersa (26/03/2024), la bele simu hosi Diretór Ezekutivu SERVE,I.P, Florêncio da Costa Sanches tanba partisipa hela iha kongresu Assosiasaun Transporte Kontentóres Portu Timor-Leste (ATCPTL-sigla portugés).
Vizita surpreza Primeiru-Ministru no Ministru Koordenador bá Assuntu Ekonómia no Ministru Turizmu no Ambiente, Francisco Kalbuadi Lay, bá edifísiu SERVE,I.P hodi hatene besik liután servisu no atendimentu públiku iha institutusaun Estadu refere.
Supervisora servisu SERVE,I.P, Ana Jeánnie de Corte-Real . Foto/Tome da Silva
Supervisora servisu SERVE,I.P, Ana Jeánnie de Corte-Real klarifika katak vizita Vise PM Francisco Kaluadi Lay nian mai edifísiu SERVE,I.P ne’e hanesan vizita surpreza no tempu hanesan Diretór Ezekutivu SERVE la’ós la tama servisu, maibe partisipa hela kongresu ATCPTL liga hos servisu SERVE, I.P nian.
“Diretór Ezekutivu SERVE,I.P la’ós la tama servisu, ami nia diretór mai servisu, apenas nia bá partisipa hela reuniaun ATCPTL ho nune’e labele mai partisipa iha momentu vizita hosi V-PM no Ministru MAKE nian,” Ana Jeánne de Corte-Real klarifika bá Hatutan com relasiona ho notísia ne’ebé ho títulu Vise-Primeiru-Ministru Francisco Kalbuadi Lay Halo Vizita Supreza bá SERVE I.P Maibé Diretór Ezekutivu Seidauk Tama Servisu, edisaun Tersa, 26 fulan-Marsu 2024.
Nia hatutan liga ho numeru notifikasaun ne’ebe SERVE, I.P simu hosi Gabineti MKAE la’ós 076, maibé 061/ 17 de Novembro de 2023, enkuantu numeru funsionariu ne’ebe hetan notifikasaun hodi obriga sira tenke hela iha uma no labele tama servisu hamutuk 166 la’ós 176.
Jornalista: Leopoldina de Carvalho