Forsa Konjunta Kaptura Suspeitu Na’in-rua bá Kazu Na’ok Sasán

Hatutan.com, (02 Abríl 2024), Díli-Forsa konjunta hosi Departamentu Investigasaun Kriminál Nasionál (DIK), Servisu Informasaun Polísia (SIP), Polísia Nasionál Timor-Leste (PNTL), no Servisu Informasaun Militár ho Unidade FALINTIL hosi FALINTIL-Forsa Defeza Timor-Leste (F-FDTL) kaptura tán suspeitu na’in-rua ho inisial Aa no DLFS, tanba durante ne’e na’ok sasán iha kapitál Díli.

Lee Mós: Polísia Kaptura Suspeitu Na’in-tolu Utiliza Karreta Luxu bá Na’ok Loja LEADSO iha Liquiça

Polísia kaptura suspeitu na’ok sasán iha Díli. Foto/Elio dos Santos da Costa

Informasaun ne’ebé Hatutan.com asesu hosi  fonte pesoál sekreta balu katak, suspeitu na’in-rua ne’e, Forsa Konjunta kaptura ho baze bá Mandadu Detensaun hosi Tribunál Judisial Primeira Instánsia Díli (TJPID) ho NUC : 0060/24.PNSIC.

Suspeitu na’in-rua ne’e kaptura iha Tersa (02/04/2024) tuku 15:00 Otl, iha área Díli laran, maibé hosi fatin diferente. Ida ho inisial Aa kaptura iha área Kampung-Alor Gang-1, Suku Kampung-Alor, Postu-Administrativu Dom Aleixo, iha  tuku 16:00 Otl no suspeitu ho inisiál DLFS, kaptura iha área hela-fatin Audian Top-one, Aldeia Beheda, Suku Santa-Kruz, Postu-Administrativu Na’in-Feto, iha  tuku 15:46 Otl.

Iha Mandadu Detensaun hosi Tribunál Díli nian ne’e haktuir katak, arguidu sira komete iha kríme Furtu-Agravadu, Artigu 252, Lei Kódigu-Penál Timor-Leste.

Dadaun ne’e, suspeitu sira-ne’e submete hela bá investigasaun no  detensaun iha sela Polísia Munisípiu Díli, durante oras 72, molok submete bá Primeiru Interrogatóriu Judisiál iha Tribunál Díli.

Jornalista: Rogério Pereira Cárceres