MP Alega Prizaun Preventiva bá Arguido Sira Uza Karreta Luxu Na’ok Sasán Loja LEADSO

Hatutan.com, (02 Abríl 2024), Díli-Tribunál Judisial Primeira Instánsia Díli (TJPID), Tersa (02/04/2024), tuku 14:00 Otl,  hahú primeiru interrogatóriu judisial bá arguidu na’in-tolu ho inisial MMH, ET no AM, tanba envolve iha kazu sobu odamatan loja  LEADSO  iha Liquiça hodi  na’ok sasán iha loja laran, inklui foti osan no futu loja na’in.

Lee Mós: Polísia Kaptura Suspeitu Na’in-tolu Utiliza Karreta Luxu bá Na’ok Loja LEADSO iha Liquiça

Polísia lori arguido sira komete kazu na’ok iha loja LEADSO iha Liquiça bá tuir primeira interrogatoriu judisiál iha Tribunál Díli. Foto/Elio dos Santos da Costa

Defensór Públiku Manuel Sarmento ne’ebé fó asisténsia legal bá arguido sira ne’e, informa durante iha audiénsia primeiru interrogatóriu ne’e, Ministériu Públiku (MP) liuhosi Prokuradór Ricardo Cardoso Leite, alega arguidu sira bá Prizaun Preventiva tanba envolve iha Kríme Roubo (na’ok ho violénsia), iha Artigu 253, Lei Kodigu Penál Timor-Leste.

“Prosesu primeiru interrogatóriu ne’e Tribunál mak sei deside, maibe, hosi Ministériu Públiku dehan atu halo detensaun preventiva. Hosi defeza nia haree, maske kazu ne’e todan oitoan, maibé ha’u haree medida ne’e aplika de’it Aprezentasaun Periódika, tanba primeira-vez halo, no sira ne’e servisu laiha mak halo buat sira-ne’e,” Prokuradór Ricardo Cardoso Leite, hateten bá jornalista sira.

Hafoin rona tiha parte hotu, Tribunál deside hodi adia ka muda desizaun inkéritu ne’e bá Kuarta aban  (03/04/2024), tuku 14:00, Otl, hodi rona medida koasaun ne’ebé sei aplika bá arguido sira.

Audiénsia Primeiru Interrogatóriu Judisial ne’e prezide hosi Juiza Ercília de Jesus, Ministériu Públiku (MP), reprezenta hosi Prokuradór Ricardo Cardoso Leite, no Arguido sira hetan Asisténsia Legál hosi Defensor Manuel Sarmento ho Humberto da Costa.

Kronolójia Kríme

Portavós Komandu Jerál Polisia Nasionál Timor-Leste (PNTL) Superintendente Polisia António da Luz, informa, Suspeitu sira-nia envolvimentu iha kazu sobu odamatan loja Xinéz nian (Loja LEADSO) ne’e akontese iha Aldeia Leopa, Suku Dato, Kinta (28/03/2024), tuku 03:45, madrugada.

Arguido na’in-3 bá kazu na’ok sasán iha loja LEADSO, Munisípiu Liquiça. Foto/Elio dos Santos da Costa

“Akontesimentu ne’e ita nian sidadaun na’in-haat ne’ebé tama iha loja Xinés sira nian iha Liquiça. Sira na’in-haat tama hodi na’ok sasán ne’ebé iha loja laran. Antes atu foti sasán hirak ne’e sira kesi tiha loja na’in ho naran Wan Yong Chao, depois maka foti sasán sira ne’e,” Portavós Komandu Jerál PNTL, António da Luz, hateten bá jornalista sira liuhosi konferénsia imprénsa, Segunda (01/04/2024).

Hafoin foti tiha sasán iha loja laran, Suspeitu sira fila no husik fila-fali loja na’in. Nune’e, loja na’in ne’e informa kedas bá Komandu PNTL Munisípiu Liquiça no  iha tempu hanesan, membru polísia sira halo kedas atuasaun hodi halo kapturasaun bá suspeitu na’in-tolu. Tuir loloos na’in-haat, mais, ida konsege halai liu, hetan de’it sira na’in-tolu.

Suspeitu na’in-tolu ne’e, ida ho inisial ET, halo ona kazu bá dala-lima, tama sai komarka. Ida ho inisial AM, komete ona mós kazu bá dala-rua, no Suspeitu MMH foin bá dala-uluk envolve iha kazu na’ok sasán.

Iha akontesimentu ne’e, suspeitu sira konsege foti osan ho valór $7,000 resin. Osan tomak ka tahan hamutuk $5,000, no osan rahun hamutuk $2,000. Sasán ne’ebé suspeitu sira lori hodi ameasa loja na’in maka, katana ida ho sabit rua. Depois ho tali ne’ebé mak sira uza hodi kesi loja na’in.

Tempu ne’ebá, Polísia konsege halo mós apreensaun bá evidénsia sira hanesan kareta rental rua (1) ho Marka CX-7, kór mutin, Xapa Matrikula A. 12-4xx TL, xáve ni no dokumentu kareta nian. (2) Marka Land Cruser Prado, kór-Silver, Xapa Matrikula 23-0xx TL.

Kareta rua ne’e maka Suspeitu sira utiliza hodi na’ok sasán, no tanba ne’e maka asegura hela evidénsia sira ne’e iha Komandu Munisípiu Liquiça.

Jornalista: Rogério Pereira Cárceres