Partidu Demokrátiku “Prontu” bá Remodelasaun

Hatutan.com, (03 Abril  2024), Díli—Sekretáriu Jerál Partidu Demokrátiku (PD), deputadu António da Conceição ‘Kalohan’ konsidera Primeiru-Ministru (PM), Kay Rala Xanana Gusmão iha kompeténsia atu halo remodelasaun bá membru IX Governu Konstitusionál ne’ebé mak hala’o servisu ladún iha prestasaun di’ak.

Sekretáriu Jerál Partidu Demokrátiku (PD), deputadu António da Conceição ‘Kalohan’. Foto: Tome da Silva.

Deputadu ne’e dehan, bainhira Primeiru-Ministru haree katak dezempeñu ministru sira ladun di’ak maka hanesan Xefe Governu iha kompeténsia atu foti desizaun hodi hasai no bele tau fali ema seluk ne’ebé konsidera iha liu kapasidade.

Lee Mós:  Isu Remodelasaun, Nino Pereira: Kompeténsia iha PM Xanana

Bainhira husu kona-bá ministru balun hosi PD karik sei tama iha lista remodelasaun, nia dehan sei la afeta bá partidu tanba nasaun ida-ne’e tenke ba oin nafatin.

“Konserteza, atu afeita bá PD dehan fraku duni hasai, tanba nasaun tenki bá oin. Ema la’ós mak nia de’it. Ne’ebé ita presiza ne’e ema ne’ebé mak di’ak hodi hala’o responsabilidade bá vida nasaun nian. Laiha problema bá PD. Ida-ne’e mós la influénsia liu ami nia votu iha Parlamentu Nasionál atu fó nafatin bá Governu,” Kalohan hateten iha PN, Kuarta (03/04/2024).

Nia dehan, agora daudaun PD ho CNRT ukun hamutuk hela, maibé sira mós tenki rekoñese katak partidu CNRT iha forsa boot liu.

“Ami hatene katak ami ki’ik, maibé ami tenki hatene an katak ami mós hola desizaun hodi hola responsabilidade bá vida nasaun nian iha tinan lima, tanba ne’e ami tenki firmi bá ida-ne’e,” nia haktuir.

Jornalista Estajiária: Zita Menezes