Tribunál Aplika TIR-AP Bá Arguido Ne’ebé Na’ok Motór

Hatutan.com, (04 Abríl 2024), Díli-Tribunál Judisiál Primeira Instánsia Dili (TJPID) liuhosi despaxu ikus, deside hodi aplika medida koasaun Termu Identidade Rezidénsia (TIR) no Aprezentasaun Periódika (AP) bá Arguido DLFS ho AA, ne’ebé mak durante ne’e na’ok ema nia motór iha kapitál Díli.

Lee Mós: Kazu Na’ok Sasán iha Díli, Arguidu Na’in-Rua Submete bá Primeiru Interrogatóriu

Arguidu na’in-rua ho inisiál DLFS no AA, iha Kinta 04 Abríl 2024 tuku 16:00 Otl, submete bá primeiru interrogatóriu judisiál iha Tribunál Judisiál Primeira Instánsia Díli (TJPID) tanba involve iha kazu na’ok motór iha kapitál Díli. Foto/Tomé da Silva.

Despaxu ikus ida ne’e, Tribunál fó sai, Kinta (04/04/2024),  hale’u tuku 18:00 Otl, hafoin primeiru interrogatóriu judisiál ne’ebé hala’o besik oras lima nia laran; hosi tuku 14:00 to’o tuku 18:00 Otl  iha TJPID.

Iha primeiru interrogatóriu judisiál ne’e, Ministériu Públiku (MP) liuhosi Prokuradór Pedro Baptista, alega Arguido sira ho Krime Furtu-Agravadu ka Roubo (na’ok) ne’ebé konsagra iha Artigu 252, Lei Kódigu-Penál Timor-Leste.

Ho krime rua-ne’e, MP husu Tribunál atu aplika medida koasaun Aprezentasaun Perióka bá Arguido na’in-rua. Maibé, hosi parte Defeza haree katak, medida ne’ebé natoon liu maka TIR no AP.

Hafoin rona tiha parte hotu Tribunál deside hodi aplika de’it medida koasaun Termu Identidade Rezidénsia no Aprezentasaun Periódika. Iha medida Aprezentasaun Periódika ne’e, Tribunál husu Arguido AA atu aprezenta aan kada loron to’o loron 15 bá Estasaun Polísia ne’ebé besik iha área ne’ebé Arguido sira rezidente bá. Enkuantu, Arguido DLFS, tenke aprezenta aan loro-loron to’o semana ida bá mós Estasaun Polísia ne’ebé besik.

Haree Tribunál Díli nia desizaun ne’e maka, Komandu Polisia Nasionál Timor-Leste (PNTL) liuhosi ekipa Departamentu Investigasaun Kriminál (DIK), akompaña fila-fali Arguido sira bá Kuartél Komandu Jerál PNTL iha Caicoli, kompleta tiha deklarasaun no dokumentu balu, molok re-integra arguido sira bá hamutuk ho família, maibé, nafatin obedese ho Tribunál ninia desizaun sira.

Audiénsia Primeiru Interrogatóriu ne’e prezide hosi Juiz Ercília de Jesus, Ministériu Públiku (MP) reprezenta hosi Prokuradór Pedro Baptista, enkuantu  arguido sira hetan asisténsia legal hosi Defensoria Públika Agostinha Oliveira.

Forsa Konjunta Ezekuta Mandadu Detensaun Tribunál

Iha Tersa, (02/04/2024), Forsa konjunta hosi Departamentu Investigasaun Kriminál Nasionál (DIK), Servisu Informasaun Polísia (SIP), Polísia Nasionál Timor-Leste (PNTL), no Servisu Informasaun Militár ho Unidade FALINTIL hosi FALINTIL-Forsa Defeza Timor-Leste (F-FDTL) kaptura suspeitu na’in-rua ho inisiál AA no DLFS, tanba durante ne’e na’ok sasán iha kapitál Díli.

Informasaun ne’ebé Hatutan.com asesu hosi  fonte pesoál sekreta balu iha tempu ne’ebá, katak, suspeitu na’in-rua ne’e, Forsa Konjunta kaptura ho baze bá Mandadu Detensaun hosi Tribunál Judisial Primeira Instánsia Díli (TJPID) ho NUC : 0060/24.PNSIC.

Suspeitu sira ne’e kaptura iha Tersa (02/04/2024) tuku 15:00 Otl, iha área Díli laran, maibé hosi fatin diferente. Ida ho inisiál AA kaptura iha área Kampung-Alor Gang-1, Suku Kampung-Alor, Postu-Administrativu Dom Aleixo, iha  tuku 16:00 Otl no suspeitu ho inisiál DLFS, kaptura iha área hela-fatin Audian Top-one, Aldeia Beheda, Suku Santa-Kruz, Postu-Administrativu Na’in-Feto, iha  tuku 15:46 Otl.

Iha Mandadu Detensaun hosi Tribunál Díli nian ne’e haktuir katak, arguidu sira komete iha kríme Furtu-Agravadu, Artigu 252, Lei Kódigu-Penál Timor-Leste.

Informasaun ne’ebé Hatutan.com rekolla iha terrenu katak, motór ne’ebé Arguido sira na’ok, ho marka Beat (la temi kona-bá kór saida, xapa matrikula hira, no sá data ka loron mak arguido sira na’ok), maibé, motór ne’e mós Arguido sira lori bá fa’an tutan tán ona bá ema balu iha área Postu Administrativu Natarbora, Munisípiu Manatuto.

 Jornalista: Rogério Pereira Cárceres