Proposta Altersaun Lei CAC Seidauk To’o iha PPN

Hatutan.com, (05 Abríl  2024), Díli– Prezidente Parlamentu Nasionál (PPN), Maria Fernanda Lay, seidauk simu proposta Lei alterasaun daruak hosi lei númeru 8/2009 15 Jullu, Comissão Anti Corrupção (CAC, sigla portugés) ne’ebé Governu submete ona.

Lee Mós: Governu Haruka Ona Proposta Alterasaun Lei CAC bá PN

Prezidente Parlamentu Nasionál, Maria Fernanda Lay. Foto/Rogério Pereira Cárceres

“Ha’u seidauk simu ne’e atu pronúnsia saida. Sé simu ona klaru katak ha’u hatuun bá komisaun kompetente atu tau matan bá ne’ebá hodi aselera,” Maria Fernanda Lay informa  bá jornalista iha PN, Sesta (05/04/2024).

Nia haktuir  labele iha vakatura ida ne’ebé tempu naruk bá komisáriu  Comissão Anti Corrupção (CAC) agora altera atu halo nusa nia tenei haree lai hafoin bele halo pronúnsia.

“Governu ho situasaun ne’ebé impase tan ne’e mak presiza altera para iha maiória simples. Agora, artigu ne’ebé mak atu  book  ha’u seidauk iha koñesimentu bá ida-ne’e. La’ós dehan lei ne’e ha’u lahatene hanesan iha média balu hakerek ita-boot sira hanesan média ajuda dezeminasaun ida-ne’e bá públiku tanba FONGTIL mak kritiká Parlamentu Nasionál dehan halo kongkalikon ho Governu hodi halakon tiha, la’ós hanesan ne’e,” Nia haktuir.

Nia hatutan, sé kompeténsia hosi órgaun sira ne’e sa’e bele elemina iha parte balu, maibé iha nesesidade atu tau matan bá korrupsaun. Depois liga ho korrupsaun Timor-Leste la aat liu kompara ho nasaun seluk.

Nia subliña PN sei tau prioridade bá proposta alterasaun bá  lei CAC tanba tinan ida ona laiha Komisáriu CAC.

“Sé laiha konsénsu ita muda lei intensaun di’ak, maibé sé laiha konsénsu ita dada naruk, nasaun labele iha kondisaun ida hanesan iha asuntu balu ita iha konsénsu ita labele muda lei ita bele la’o bá oin labele sai impedimentu prosesu lejislativu sai impedimentu bá prosesu Governasaun,” Nia espliká.

Jornalista Estajiária : Zita Menezes