AIFAESA Tenke Halo Ezame Laboratóriu bá Ice Cream Molok Fa’an

Hatutan.com, (08 Abríl 2024), Díli—Organizasaun Naun Governamentál (ONG) Luta Hamutuk (LH) husu bá Governu liu hosi Autoridade de Inspeção e Fiscalização da Atividade Económica Sanitária e Alimentar (AIFAESA) tenki iha teste laboratóriu bá produtu Ice Cream inklui hahan sira seluk molok fa’an bá públiku atu konsumu.

Diretór Ezekutivu Luta Hamutuk Jose Alves da Costa. Foto/Lazaro Pereira Quefi.

“AIFAESA tenki halo teste laboratóriu bá produtu ice cream ne’e inklui hahan sira seluk molok fa’an bá populasaun hodi konsumu, tanba ita nia saúde ne’e importante. Labele halo inspesaun de’it maibé tenki halo mós teste,” diretór ezekutivu Luta Hamutuk, José Alves da Costa hateten bá Hatutan.com iha servisu fatin Faról, Segunda (08/04/2024).

Lee Mós: Governu ho Polísia Taka Fabrika Ice Cream Tanba La Ijiene

LH lakohi atu produtu sira ne’e lori moras hada’et oioin mai populasaun Timor-Leste tanba ne’e presiza tebes mós atu haforsa ho Lei sira nune’e ema ne’ebé mak halo produsaun bá kualkér produtu iha rai laran tenki iha nia padraun rasik.

“Pior liu tán mak sira la iha ijiene. Hahalok ne’e Governu tenke kuidadu liuliu AIFAESA tenki halo duni inspesaun bebeik no tenke halo ezame laboratóriu,” nia hateten.

LH mós apela bá komunidade ne’ebé hetan empreza ka pessoál ruma ne’ebé fa’an produtu ruma laiha kualidade no la ijiene tenke halo keixa bá parte relevante sira atu halo atuasaun lalais.

Jornalista Estajiáriu: Lazaro Pereira Quefi