Governu Rekolla Hela Dadus Atu Fó Solusaun bá Folin Foos

Hatutan.com, (08 Abríl 2024), Díli-–Vise-Primeiru-Ministru no Ministru Koordenadór ba Asuntu Ekonomia no Ministru Turizmu no Ambiente Francisco Kalbuadi Lay,  hateten Governu iha hela prosesu identifikasaun no rekolla dadus bá problema folin foos no sei fó solusaun iha tempu badak.

Lee Mós: Iha Problema ho Dokumentu, Governu Seidauk Selu Importadór Foos Subsídiu

Foos tonelada 4.000 ne’ebé Governu liu hosi Ministériu Koordenadór Assuntu Ekonómiku (MKAE) sosa iha Cambodia ho $3.000,000, faze dahuluk nian tonelada 2.000 to’o ona Timor-Leste (TL) iha Portu Tibar no  rai iha Centro Logistico Nacional (CLN), Kuarta (01/02/2024). Foto/Vito Salvadór

Vise-Primeiru-Ministru no Ministru Koordenadór ba Asuntu Ekonomia no Ministru Turizmu no Ambiente Francisco Kalbuadi Lay hateten, Segunda (08/04/2024), hafoin hasoru malu ho Prezidente Repúblika José Ramos-Horta iha Palásiu Prezidensiál.

“Problema foos ne’e Governu tau atensaun dezde tinan kotuk liu husi subsídiu ne’ebé halo bá empreza importadór sira atu bele redús folin foos iha merkadu. Ami rona rasik no Prezidente Repúblika mós hato’o katak folin foos iha fatin balun iha territóriu nasionál, la’ós hotu-hotu iha empreza balun fa’an foos ho folin as no balun fa’an kilograma  25 ho folin $20.00 too $25.00 kada saku  no ida ne’e ami haree hela,” Vise-Primeiru-Ministru Francisco Kalbuadi Lay hateten.

Vise-Primeiru-Ministru no Ministru Koordenadór ba Asuntu Ekonomia no Ministru Turizmu no Ambiente ne’e hatutan, foos rezerva hosiGgovernu iha hela no sei tenta atu halo intervensaun hodi redús folin foos iha merkadu hodi bele fasilita povu asesu bá foos ho folin baratu.

“Ita iha foos rezerva ne’ebé Governu sosa liu husi Sentru Lojístika Nasionál (CLN, sigla portugés) no oras ne’e ekipa husi ministériu relevante sira hahú tun bá munisípiu halo identifikasaun, atu nune’e, bele iha solusaun ba problema folin foos,” Francisco Kalbuadi Lay tenik.

Jornalista: Vito Salvadór