Hatutan.com, (08 Abríl 2024), Díli—Reprezentante Espesiál Austrália ba Greater Sunrise, Esteve Bracks, hasoru-malu hikas ho Primeiru-Ministru (PM), Kay Rala Xanana Gusmão hodi atualiza progressu dezenvolvimentu Greater Sunrise.
Esteve Bracks atualiza katak, progressu ida hosi Greater Sunrise maka Timor-Leste (TL) ho Austrália kontrata ona Empreza Wood-Austrália ne’ebé ninia edifísiu iha Londres hodi halo estudu bá konseitu ekonómiku iha semana kotuk no tuir planu sei konklui iha tinan 2024.
Lee Mós: Xanana Gusmão Husu Empreza Woodside Kontribui Lori Kadoras Greater Sunrise Mai TL
Esteve Bracks konsidera reuniaun ho Primeiru-Ministru Xanana Gusmão ho Ministru Petróleu, Rekursu no Minerál Francisco da Costa Monteiro, pozitivu tebes tanba konsege halo diskusaun kona-bá Greater Sunrise no oinsá dezenvolve iha futuru.
“Ami hili no kontrata ona kompañia ida hodi halo estudu bá konseitu ekonómiku bá projetu Greater Sunrise. Rezultadu estudu ne’e sei fó-sai iha tinan ida-ne’e. Hosi estudu ne’e mak bele hatene loloos projetu ne’e dezenvolve iha ne’ebé no oinsá,” Hatutan.com sita deklarasaun Esteve Barcks iha komunikadu, Segunda (08/04/2024).
Iha fulan novembru 2023, reprezentante espesiál ne’e hasoru ona Xefe Governu hodi ko’alia kona-bá estudu ne’ebé daudaun ne’e halo hela no sira defende katak, Austrália prefere halo estudu viabilidade foun bá konseitu dezenvolvimentu Greater Sunrise.
Estadu Timor-Leste liuhosi Timor GAP, E.P hola parte ona iha konsórsiu Greater Sunrise ho partisipasaun maioria reprezenta 56,56%, Woodside (operadora) 33,44% no Osaka Gas 10%.
Jornalista: Rogério Pereira Cárceres