Povu Covalima Presiza Tebes Estrada

Hatutan.com, (08 Abríl 2024), Díli— Deputadu Natalino dos Santos hosi bankada CNRT, levanta iha plenária Parlamentu Nasionál (PN) kona-bá preokupasaun povu munisípiu Covalima liga ho kondisaun estrada ne’ebé aat tebes, sempre difikulta movimentu populasaun iha tempu naruk nia laran.

Deputadu Natalino dos Santos hosi bankada CNRT.

Deputadu ne’e husu bá Governu atu tau prioridade bá estrada ligasaun Suai bá Postu-Administrativu Maukatar ne’ebé kondizaun aat tebes hodi bele fasilita populasaun transporta sira nia produtu lokál mai iha kapitál Covalima.

Lee Mós: Veteranu sira ho Povu Covalima husu Governu Aselera Dezenvolvimentu Projetu Supply Base

Alende ne’e, estrada ne’ebé liga hosi Tiliomar bá Fatumea ho distánsia ne’ebé dook tebes, komunidade prefere assesu merkadu iha Indonézia nian kompara ho merkadu Covalima.

“Komunidade iha área sira ne’e presiza tebes estrada. Husu Governu atu tau iha konsiderasaun,” Natalino dos Santos hateten iha plenária, Seguna (08/04/2024).

Kona-bá preokupasaun ne’e, Vise-Ministru Asuntu Parlamentár, Adérito da Costa Hugo hateten, kestaun kona-bá konstrusaun estrada, ponte no irrigasaun ne’ebé mak hetan estragu, oras ne’e daudaun Ministériu Obras Públiku (MOP) hala’o hela servisu iha terenu halo hela levantamentu no sei loke tenderizasaun oinsá kompañia sira prienxe rekezitu hodi bá halo intervenzaun.

Jornalista Estajiária: Zita Menezes