Importadór Foos Subsídiu Creative Furak Prontu Kompleta Dokumentu

Hatutan.com, (09 Abríl 2024), Díli—Loja Creative Furak nu’udár mós empreza importadór foos subsídiu ne’ebé hetan fiar hosi Governu, simu ona notifikasaun hosi Ministeriu Komérsiu no Indústria (MCI, sigla portugés) atu kompleta dokumentu komprovadu sira kona-bá rekizitu  prosesu pagamentu bá foos subsídiu.

Lee Mós: Governu Rekolla Hela Dadus Atu Fó Solusaun bá Folin Foos

Ekipa AIFAESA hala’o inspesaun ba loja Cretive Furak iha Akadiru-hun,Díli, Foto/Dok.Hatutan.com.

Asistente jestór loja Creative Furak, Yati Zaka hateten sira-nia parte simu ona karta husi ( MCI  hodi halo kompleta dokumentu hirak ne’ebé mk falta. Maibé, sira triste uitoan tanba  antes ne’e sira aprejenta ona relatóriu subsídiu foos ne’e bá iha MCI laiha problema, maibé to’o ikus foin mosu problema.

“Hosi inísiu subsídiu premeiru hahú to’o remata ami lori kedas relatóriu bá aprezenta iha MCI, maibé triste tebes tanba  besik fulan-Marsu nia rohan ona Regulasaun Komérsiu foin bolu ami bá hodi fó hatene katak dokumentu la kompletu no seluk tan,” Yati Zaka  hateten bá Hatutan.com via telefónika, Segunda (08/04/2024).  

Yati Zaka informa antes ne’e hosi parte MCI konfirma liu husi telefónika, maibé hafoin iha semana kotuk mak ekipa hosi MCI lori karta husu kompañia atu kompleta dokumentu.

“Relatóriu 60-resin kompradór foos subsídiu nia mk seidauk kompletu no ohin loron ami entrega ona bá Diresaun Nasionál Regulasaun Komérsiu,” Yati Zaka informa.

Empreza importadór foos subsídiu  Creative Furak prontu koopera bainhira Governu fó notifikasaun dehan sei falta.

Loja Creative Furak hetan kontratu hosi Governu liuhosi MCI importa foos subsídiu ho tonelada 7.500 ho kontratu kada saka kilograma 20 fa’an ho folin $11,00 iha tinan-kotuk.   

Lee Mós: Iha Problema ho Dokumentu, Governu Seidauk Selu Importadór Foos Subsídiu

Jornalista: Leopoldina de Carvalho