PM Xanana Hala’o Viazen Servisu bá Nasaun Tolu

Hatutan.com, (10 Abríl 2024), Díli—Primeiru-Ministru (PM), Kay Rala Xanana Gusmão, hala’o viazen servisu bá nasaun tolu, hodi partisipa reuniaun importante sira atu hametin kooperasaun bilaterál ho Timor-Leste.

Primeiru-Ministru (PM), Kay Rala Xanana Gusmão, hala’o viazen servisu bá nasaun tolu, hodi partisipa reuniaun importante sira atu hametin kooperasaun bilaterál ho Timor-Leste, Kuarta (10/04/2024) ho aviaun Aero Díli. Foto: Média PM.

Dezlokasaun Xefe Governu nian ne’e nu’udar vizita ofisiál iha kuarta 10 Abril 2024 ho aviaun Aero Díli,  ne’ebé sei hala’o uluk vizita bá Reinu Unidu iha loron 11 Abríl.

Lee Mós: Xanana Semo ho Aero Díli Hodi Partisipa Forum Estadu Arkeolójiku iha Bali

“Tuir ajenda, PM Xanana sei hala’o enkontru ho Konsellu Seniór kona-bá asuntu sira ne’ebé relasiona ho fronteira marrítima nian,” Hatutan.com sita komunikadu.

Iha loron 14 to’o 18, fulan-Abríl PM Xanana reprezenta Prezidente Repúblika, José Ramos-Horta partisipa iha konferénsia Oseanu ba dala-sia, iha Atenas, Gregu.

Nune’e, iha loron 18 Abríl Xefe Ezekutivu ne’e partisipa iha esposizasaun Arte Internasionál ba dala-60, ne’ebé hala’o iha Biennale de Venice-Italia.

Xefe Governu Xanana akompaña hosi, Sekretariu Estadu Arte no Kultura (SEAK), Jorge Soares Cristovão hamutuk ho Artista Timor-oan, Maria Madeira sei hala’o lansamentu espozisaun arte konteporánea hosi tais Timór no filme dokumentáriu kona-ba feto Timor-Leste ne’ebé aprezenta iha Expoziasaun Internasionál Biennale de Venice-Italia.

Expozisaun ne’e rasik sei hala’o durante fulan hitu, Abril too Novembru 2024, sei partisipa hosi nasaun 90 no Timor-Leste hahú hala’o ona preparasaun masimu atu promove Timor-Leste ninia obra arte konteporánea oin-oin.

Iha espozisaun ne’e, Timor-Leste sei aprezenta projetu istória feto Timor-Leste ne’ebé prepara hosi Artista, Maria Madeira ho tema “Kiss and Don’t Tell” (Rei, Mais Labele Ko’alia), ne’ebé apoia hosi Kuradora, Natalie King ho ekipa produtor filme hosi Austrália, Artista Timor-oan, Alfeu Pereira no pintór sira hosi Grupu Arte Moris.

PM Xanana sei hala’o servisu nasaun nian iha nasaun tolu ne’e hahú loron 10 Abríl to’o loron 23 Abríl 2024 sei fila hikas mai Timor-Leste.

Jornalista: Rogério Pereira Cárceres