Xanana Enkoraza Konsuladu Jerál iha Bali Presta Servisu ho Profisionál

Hatutan.com, (10 Abríl 2024), Díli— Primeiru-Ministru (PM), Kay Rala Xanana Gusmão molok kontinua viajen bá Reinu Unidu, halo vizita ida bá Konsuladu-Jerál Repúblika Demokrátika Timor-Leste (RDTL), iha Provínsia Bali-Indonézia, iha área Tukad Mas I/no 4-Renon, Denpasar-Indonézia.

Primeiru-Ministru (PM), Kay Rala Xanana Gusmão molok kontinua viajen bá Reinu Unidu, halo vizita ida bá Konsuladu-Jerál Repúblika Demokrátika Timor-Leste (RDTL), iha Provínsia Bali-Indonézia, iha área Tukad Mas I/no 4-Renon, Denpasar-Indonézia, Kuarta (10/04/2024). Foto: Média PM.

Vizita Xefe Governu nian ne’e, iha ámbitu viajen serbisu ba nasaun tolu hanesan, Reinu Unidu, Gregu no Itália.

Lee Mós: PM Xanana Hala’o Viazen Servisu bá Nasaun Tolu

Iha vizita ne’e, Xefe Governu observa plaka sira ne’ebé iha edifísiu Konsuladu hahú monta ona iha aredór Konsuladu nian, hafoin edifísiu ne’e inaugura iha loron 19, fulan-Janeiru 2024.

Primeiru-Ministru husu bá funsionáriu sira ne’ebé servisu iha Konsuladu Timor-Leste iha Bali atu presta servisu ho Profisionál hodi fó susesu ba servisu hotu-hotu.

“Imi servisu nafatin ho di’ak, tanba imi maka reprezenta ita-nia imajen atu hametin kooperasaun ho Governu Indonézia liuliu iha Bali,” Hatutan.com sita deklarasaun PM Xanana iha komunikadu.

Konsul-Jerál Timor-Leste iha Bali, Aleixo V. da Silva hamutuk ho ekipa agradese ba vizita ne’e. Tanba servisu ne’ebé sira halo reprezenta imajen Estadu Timor-Leste nian iha ASEAN liu-liu iha Bali hodi fó atendimentu bá servisu no vizita entidade Estadu Timor-Leste no povu ne’ebé hala’o movimentu bé estranjeiru liuhosi Bali.

Servisu ne’ebé konsuladu hala’o hodi kumpri mós polítika IX Governu Konstitusionál ne’ebé define Timor-Leste nia polítia esterna ho prinsípiu ida-ne’ebé konsagra sentidu independénsia no soberania maka, “Ba Timor-Leste, Laiha Aliadu ka Inimigu, Hotu-Hotu sei Hamutuk no AMIGUS de’it!”.

Ida ne’e sai hanesan Timor Leste nia lema ne’ebé sei orienta iha relasoens esternas, iha konjuntura internasionál sira hodi hametin no simu nasaun hotu-hotu iha kooperasaun servisu sira.

Konsuladu Timor-Leste hahú harii primeiru iha Bali, iha fulan-Outubru 2006 ho pozisaun estratéjiku hodi hametin kooperasaun entre Timor-Leste no Indonézia, liu-liu iha Bali.

Vizita Xefe Governu akompaña hosi, Konsul-Jerál Timor-Leste iha Bali, Aleixo V. da Silva, ho ekipa ne’ebé atualiza mós bá Xefe Governu kona-bá progresu servisu ne’ebé sira halo iha área oin-oin hodi reprezenta misaun diplomátiku nian, iha Bali-Indonézia.

Dadaun ne’e diplomata Timor-oan hamutuk na’in sia (9) kompostu hosi Xefe Misaun Primeiru Sekretária, Tékniku  Administrativa, Adidu no Asistente Adidu no funsionáriu lokál hamutuk na’in-19 ne’ebé servisu iha área oin-oin hanesan, migrasaun, saúde, edukasaun no seluk-tán.

Jornalista: Rogério Pereira Cárceres