Nasionál
2025, Governu Rezolve Problema Internet
Hatutan.com, (12 Abríl 2024), Díli- Ministru Transporte no Komunikasaun (MTK), Miguel Marques Gonçalves Manetelu, hateten tinan 2025 Governu rezolve problema internet iha Timor-Leste bainhira kabu submarinu instala ona.
Lee Mós: IX Governu Konstitusionál Sei Presta Servisu Loloos iha 2025
Ministru Transporte no Komunikasaun (MTK), Miguel Marques Manetelu. Foto/Tome da Silva
Ministru Miguel Marques Gonçalves Manetelu bá jornalista sira iha Palásiu Prezidensiál, Sesta (12/04/2024), hateten solusaun úniku atu responde problema internet ne’ebé lentu mak kabu submarinu.
“Estadu halo investimentu bá kabu submarinu ne’e tanba kestaun liña internet ne’ebé lentu ka lenuk ne’e,” Miguel Marques Gonçalves Manetelu hateten.
Nia argumenta katak kapasidade Bandwidth husi operadór telekomunikasaun tolu (Timor Telecom, Telkomcel no Telemor) no ISP (Internet Service Provider) sira ne’ebé fornese internet sira nia kapasidade mak nune’e ona, tanba ne’e Estadu deside halo investimentu bá kabu submarinu.
“Ita hein uitoan hanesan ha’u hatete bei-beik ona no ita hakat ba 2025 ita laiha ona problema liña internet,” Miguel Manetelu afirma tan.
Jornalista: Vito Salvadór