Hatutan.com, (15 Abríl 2024), Díli—Primeiru-Ministru (PM), Kay Rala Xanana Gusmão apela bá Timor-oan sira ne’ebé hala’o atividade no manán espriénsia servisu oioin iha Reinu Unidu, atu servisu ho disiplina no profisonál hodi hetan osan hadi’a ekonomia família, no kontribui bá dezenvolvimentu Timor-Leste.
Xanana hasoru-malu ho komunidade timor-oan no embaixadór Timor-Leste iha Reinu Unidu, João Paulo iha serimónia lansamentu bá programa Podcast “The Citizen’s Connection” iha Otél Sanderson London, Sesta (12/04/24). Foto: Media PM.
“Ba Timor-oan sira tomak ne’ebé mai buka oportunidade para mai hadi’a sira-nia moris iha Reinu Unidu, hakuak bo’ot no domin tomak ba imi. Imi-nia família tomak hatene imi bá buka esforsu an iha ne’e. Primeiru tanba ita-nia rain seidauk bele oferese servisu bá ema hotu. Segundu, aproveita oportunidade ida-ne’e imi hadi’a família-nia vida iha Timor,” Hatutan.com sita mensajen Xanana iha komunikadu bainhira hamutuk ho embaixadór Timor-Leste iha Reinu Unidu, João Paulo halo lansamentu bá programa Podcast “The Citizen’s Connection” iha Otél Sanderson London, Sesta (12/04/24).
Governu liu hosi Emabixada Timor-Leste iha Reinu Unidu kontinua nafatin habelar ninia programa diplomatika nian no tau matan ba Timor-oan sira hotu ninia kondisaun.
Primeiru-Ministru ne’e informa katak, Governu kontinua suspende atividade Grupu Arte Marsiál (GAM) no Grupu Arte Rituál (GAR) hodi hein atu loke programa kompetisaun desportu nivel nasionál.
Advertisement
Iha fatin hanesan, Prezidente Asosiasaun Timor iha sidade Peterborough-Reinu Unidu, Celso Oliveira konsidera mensajen Xefe Governu importante hodi motiva Timor-oan sira kontinua servisu disiplina no promove kultura no unidade nasionál entre Timoroan.
Celso Oliveira agradese ba Governu Timor-Leste ne’ebé halo esforsu makas atu kontinua sosa rai hodi harii embaixada Timor-Leste nian iha Reinu Unidu hosi fasilita servisu governu no atende Timor-oan sira.
Nia hatutan, durante ne’e Asosiasaun Timor iha sidade Peterborough-Reinu Unidus mós sempre selebra eventu desportu no selebrasaun kultura hodi promove identidade Timor-Leste nian no kontinua bolu atensaun ba ema hotu mantein paz no dame iha ida-idak nia hela hela fatin no fatin servisu sira.
Hafoin hato’o mensajen, iha parte lokraik, Xefe Governu hamutuk ho Embaixadór Timor-Leste ba Reinu Unidu, João Paulo oferese mós jantar kalan no hanamu muzika Timór hamutuk ho Timor-oan sira hodi kontinua tatoli mensajen domin no fraternidade nian.