Foos Subsídiu Beruang Merah Tama Ilegál iha TTU

Hatutan.com, (18 Abríl 2024), KEFAMENANU— Autoridade militár Indonézia nian (TNI sígla Indonesia) ne’ebé hala’o seguransa iha liña fronteira terrestre, halo apreensaun bá foos subsídiu ho marka Beruang Merah ho kuantidade 200kg ne’ebé hatama ilegalmente hosi sidadaun balun hosi Indonézia liu hosi Fronteira Terrestre iha área suku Sunsea, postu administrativu Naibenu, munisípiu Timor Tengah Utara (TTU), provínsia Nusa Tenggara Timur (NTT), Repúblika Indonézia (RI), Kuarta (17/04/2024).

Autoridade militár Indonézia nian (TNI sígla Indonesia) prende foos subsídiu ho marka Beruang Merah ne’ebé hatama ilegalmente hosi sidadaun balun hosi Indonézia liu hosi Fronteira Terrestre iha área suku Sunsea, postu administrativu Naibenu, munisípiu Timor Tengah Utara (TTU), provínsia Nusa Tenggara Timur (NTT), Repúblika Indonézia (RI), Kuarta (17/04/2024). Foto espesiál.

Kontributór Hatutan.com hosi Kefamenanu relata katak, Autoridade TNI ne’ebé konsege halo apreensaun bá foos illegál ne’e mai hosi Komponente Terrestre Satgas Pamtas RI-RDTL Seitór Oeste Yonkav 6/Naga Karimata.

Lee Mós: CCI-TL Preokupa Foos Subsídiu Fa’an iha NTT, Governu Seidauk iha Informasaun

Autoridade TNI konsege halo apreensaun ne’e liu hosi informasaun ne’ebé hato’o hosi populasaun iha área ne’e, liu hosi atividade komunikasaun direta ne’ebé halo hosi Satgas.

Bazeia bá informasaun hosi Komandante TNI Postu Sunsea, Nelu Letda Kav Ari Ritonga, alerta kedan bá membru sira halo kedan patrullamentu iha dalan illegál sira ne’ebé baibain pratikante atividade illegál sira deskonfia liu hosi ne’ebá.

Hosi patrullamentu ne’e, ekipa TNI konsege rekolla duni foos saka 10 ho marka Beruang Merah ne’ebé  laiha na’in.

Foos Beruang Merah ne’e nu’udár foos subsídiu ne’ebé fornese hosi empreza importadór sira mak hetan kontratu hosi Governu Timor Leste (TL) ho valór millaun $4 atu distribui bá merkadu nasionál de’it.

“Hafoin ita rekolla tiha evidénsia sira ne’e, ita asegura kedan iha Postu no iha momentu ne’ebá kedan ita informa kedan bá komandante Simangunsong,” Komandante Kav Ari Ritonga hateten.

Daudaun ne’e, evidénsia sira asegura ona iha postu Satgas Yonkav 6/Naga Karimata atu bele submete bá prossesu tuir-mai.**