Komandu PNTL Distribui Karreta 47 bá Munisípiu no Unidade Sira

Hatutan.com, (18 Abríl 2024), Díli—Komandu Polísia Nasionál Timor-Leste (PNTL) iha Kinta 18 Abríl distribui tán karreta unidade hamutuk 47 bá komandu munisípiu 12, Rejiaun Administrativa Espesiál Oecusse Ambeno (RAEOA), Unidade Espesiál Polísia (UEP), Unidade Polísia Marítima (UPM) ho Unidade Patrullamentu Fronteira (UPF).

Komandu Polísia Nasionál Timor-Leste (PNTL) iha Kinta 18 Abríl distribui tán karreta unidade hamutuk 47 bá komandu munisípiu 12, Rejiaun Administrativa Espesiál Oecusse Ambeno (RAEOA), Unidade Espesiál Polísia (UEP), Unidade Polísia Marítima (UPM) ho Unidade Patrullamentu Fronteira (UPF), iha Sentru Formasaun Polísia, Comoro-Dili, Kinta (18/04/2024). Foto: Tomé da Silva.

Karreta unidade 47 ne’e ho marka Rush hamutuk 23, Pajero Sport 20, Pic Up 3 no Derek 1. Karreta sira ne’e unidade 27 mak komandu PNTL distribui uluk ona bá xefe departamentu sira, xefe gabinete sira, departamentu tránzitu nasionál ho komandu munisípiu Dili, iha Tersa (02/04/2024). Enkuantu unidade 20 mak foin halo distribuisaun tán ohin.

Lee Mós: PNTL Bobonaro Enfrenta Difikuldade Transporte

Komandante Administrasaun Komandu Jerál PNTL, Superintendente Xefe Polísia Natércia Eufrázia Soares Martins informa, karreta hirak ne’e, sosa ho orsamentu ne’ebé prevee kedan iha Orsamentu Jerál Estadu (OJE) Retifikativu 2023.

“Totál orsamentu purvolta millaun $2 no karreta sira ne’e halo kedan nia akizasaun iha tinan 2023. Totál karreta 40-resin. Ohin  bá unidade ho departamentu purvolta karreta 20. Kareta sira ne’e sosa ho orsamentu Retifikativu 2023 nian ne’ebé maka ita hatama, foin maka realiza, kompañia foin maka hatama,” Superintendente Xefe Polísia Natércia Eufrázia Soares Martins hateten iha Sentru Formasaun Polísia, Comoro-Dili, Kinta (18/04/2024).

Komandante Natércia dehan, planu sosa karreta ne’e, la’os to’o de’it iha ne’e maibé, bá oin mós sei identifika iha área balun ne’ebé presiza meius bá apoiu nian hanesan transporte.

“Ida ne’e ita sei konsidera. Bainhira iha orsamentu retifikativu ita sei tau iha ne’ebá, sé laiha, ita prepara bá iha orsamentu 2025,” nia tenik.

Komandu mós halo ona preparasaun bá sistema kontrolu bá viáturas, kombustíveis ho manutensaun ninian ho sistema dijitalizasaun to’o ona 90 pursentu (90%).

Atu antesipa akontesimentu dezastre bá viátura sira ne’ebé distribui ona, komandu iha ona orientasaun bá iha administrasaun liuhosi lojístika no departamentu transporte no manutensaun, hodi fasilita formasaun bá kondutór sira ne’ebé maka atu kondús kareta sira ne’e.

Jornalista: Rogério Pereira Cárceres