Merkadu Sira iha Kupang La Fa’an Foos Subsídiu

Hatutan.com, (18 Abríl 2024), KUPANG—Hatutan.com halo hela observasaun hodi buka-tuir foos subsídiu iha merkadu sira iha sidade Kupang, Nusa Tenggara Timur (NTT), Repúblika Indonézia (RI) ne’ebé deskonfia transporta hosi Timor-Leste (TL), maibé la konsege detekta.

Kontributór Hatutan.com halo hela observasaun iha merkadu boot rua iha sidade Kupang mak hanesan Merkadu Inpres Naikoten no mós Merkadu Inpres Oeba, inklui Merkadu tradisionál ida mak hanesan Merkadu Oesapa hodi halo identifikasaun bá foos ho marka Tali Merah, Beruang Merah, Amor da Familia no Golden Star maibé laiha. Foto: kontributór Hatutan.com.

Kontributór Hatutan.com halo observasaun iha merkadu boot rua iha sidade Kupang mak hanesan Merkadu Inpres Naikoten no mós Merkadu Inpres Oeba, inklui Merkadu tradisionál ida mak hanesan Merkadu Oesapa.

Lee Mós: CCI-TL Preokupa Foos Subsídiu Fa’an iha NTT, Governu Seidauk iha Informasaun

Durante observasaun iha terrenu, Hatutan.com la detekta foos ho marka Tali Merah, Beruang Merah, Amor da Familia no Golden Star ne’ebé nu’udár foos subsídiu hosi Governu Timor-Leste, no deskonfia sirkula iha Nusa Tenggara Timur.

Hatutan.com koko halo entrevista ho vendedór foos iha Merkadu Oesapa ho naran Boni, hateten, nunka koñese foos ho naran sira ne’ebé temi iha leten.

Tuir Boni, ninia patraun hanesan importadór foos baibain importa mai hosi provínsia Sulawesi atu fa’an iha merkadu sira iha sidade Kupang no foos hosi Timor-Leste nunka tama mai Kupang.

“Ha’u la hatene marka foos sira ne’e. Ha’u foin mak rona naran foos ho marka ne’ebé temi hanesan Tali Merah, Beruang Merah, Amor da Familia dan Golden Star,” nia hateten, Kinta (18/04/2024).

Hatutan.com konsege kapta ka hasai fotografia bá kompradór foos ida iha sidade Kupang utiliza karreta kór kinur ho xapa matrikula Timor-Leste nian, iha Merkadu Oesapa. Kompradór ne’e sosa foos saka ida maizoumenus kilograma 50. **