Prezidente Repúblika Konkorda ho Alterasaun Lei CAC

Hatutan.com, (18 Abríl 2024), Díli—Prezidente Repúblika (PR), José Ramos-Horta konkorda ho alterasaun Lei Comissão Anti Corrupção (CAC) tanba bele kontribui bá prossesu hili Komisáriu foun.

Edífisiu CAC iha Farol, Díli. Foto/Tome da Silva.

José Ramos-Horta hato’o deklarasaun ne’e bá jornalista sira iha edifísiu INFORDEPE, Balide, Kinta (18/04/2024).

Lee Mós: Alterasaun Lei CAC La Hamihis Kompeténsia Kombate Korrupsaun

“Ha’u konkorda 100% ho alterasaun Lei CAC tanba hili Komisáriu la’ós eleisaun bá Prezidente Repúblika,” Ramos-Horta espresa.

Xefe estadu haktuir, iha rai balun iha li’ur no Indonézia mós uluk Prezidente eleitu hosi Parlamentu laran hanesan Prezidente Megawati Soekarno Putri eleita ne’e mai hosi Parlamentu laran, no klaru bainhira eleita iha Parlamentu importante hetan 2/3 ka unanimidade.

Agora atu hili Komisáriu CAC ida sei presiza loos to’o 2/3, la’e, demokrasia no polítika la signifika unanimidade.

“Eleisaun bá Komisáriu CAC iha de’it maioria natón ona. Ne’e duni, ha’u konkorda ho alterasaun lei CAC, maioria simples bele hili ona,” nia subliña.

Bainhira PN haruka alterasaun Lei CAC bá Prezidénsia Repúblika to’o tuku 10:00 dader no iha tuku 11:00 sei promulga kedan.

Jornalista: Vito Salvadór