Prizioneiru Na’in-Lima Okupa Kuartu Ida, HAK Husu Governu Estabelese-tán Prizaun Foun

Hatutan.com, (18 Abríl 2024), Díli—Asosiasaun HAK sujere atu Governu estabelese tán prizaun foun tanba liu hosi monitorisazaun ne’ebé mak sira halo iha prizaun Díli, Gleno no Suai hatudu katak kondisaun infra-estrutura barak mak aat no la sufisiénte bá dadur sira ne’ebé ema na’in-lima okupa lisku kuartu ida ho medida ne’ebé kiik.

Sekretária Estadu Igualdade no Inkluzaun (SEII) fó formasaun ba Prizioneiru sira iha Prizaun Gleno Kona-bá Kontrola Hahalok Hirus, (15/11/2021). Foto/SEII.

Sujestaun ne’e Asosiasaun HAK hato’o hafoin halo audiénsia ho Komisaun A Parlamentu Nasionál (PN) ne’ebé trata asuntu Lejizlasaun no Justisa no aprezenta rezultadu monitorizasaun, iha PN Kinta (18/04/2024).

Lee Mós: Kazu Omesídiu Elemloi, Arguidu HSM Alegadu Prizaun Preventiva

Deskobrimentu ne’ebé Asosiasaun HAK hetan iha monitorizasaun ne’e maka, primeiru situasaun kona-bá infraestrutura, katak prizaun ne’e rasik iha desde tinan 22 ukun an, no edifísiu prizaun ne’e rasik mai hosi lembransa Indonézia nian.

“Entaun tinan barak ona uma kadeia sira ne’e halo de’it manutesaun. Loloos ne’e presiza harii prizaun foun no bá bloku sira ho kondisaun di’akliu tán. HAK haree prizaun tolu ne’e ninia kondisaun la di’ak hahú at,” Vise Diretór Asosiasaun HAK, Antoninho de Limas hateten.

Iha Asosiasaun HAK nia prosposta ne’e husu atu harii prizaun foun, halo mós bloku foun tanba prizaun sira agora ne’e la di’ak ona no atu halo tratamentu dignu bá prizoneiru sira.

Vise Diretór Asosiasaun HAK, Antoninho Limas.

Segundu deskobrimentu ne’ebé Asosiasaun HAK hato’o mós kona-bá kapasidade ne’ebé iha bloku ne’e barak liu, iha balun loloos ne’e ideál ema na’in-rua ka tolu mak okupa maibé ne’e na’in-lima uza kuartu ida.

Liga mós bá aparellu sira seluk iha prizaun hanesan, CCTV, R’adio komunikasaun iha prizaun tolu laiha no mós ekipamentu ka fasilidade transporte atu fasilita guarda prizionál ho prizioneiru sira bainhira atu bá halo julgamentu ezemplu iha Dili bá Suai ka Suai mai Dili maibé transporte laiha, difikulta tebes servisu prizaun nian.

Jornalista Estajiária: Zita Menezes