Armanda Berta ho Ilídio Domingos de Araújo Lidera KHUNTO Períodu 2024-2028

Hatutan.com, (21 Abríl 2024), Díli- Partidu Kmanek Haburas Unidade Nasionál Timoroan (KHUNTO) termina ona nia kongresu nasionál ho susesu no demokrátiku iha Domingu kalan (21/04/2024). Kongresu nasionál ne’ebé hala’o durante loron rua ne’e, maioria kongresista ka delegadu partidu KHUNTO nian depozita konfiansa nafatin  bá Armanda Berta dos Santos nu’udár Prezidente partidu no Ilídio Domingos de Araújo hanesan Sekretáriu Jerál bá mandatu períodu 2024-2028.

Lee Mós: Ramos-Horta Simu Konvite Nu’udár Padriñu Partidu KHUNTO

Estrutura partidu KHUNTO període 2024-2028. Foto/Elio dos Santos da Costa

Kongresu nasionál bá da-IV ne’e  aprezenta lista estrutura partidu KHUNTO nian ne’ebé Hatutan.com asesu hatudu Prezidente Partidu KHUNTO mantein ho Armanda Berta dos Santos,  Sekretáriu Jerál mak Ilídio Domingos de Araújo.  Nicolau Freitas (Vise Prezidente I), Pedro dos Reis (vise Prezidente II), Juvinal da Costa (vise prezidente III), Ivo Lay (vise prezidente IV), no  Aurora Peloy (vise prezidente V).

Adjuntu Sekretáriu Jerál I, Zeto Patrocínio, Julião da Silva (adjuntu Sekretáriu Jerál II), Teodoru Soares (adjuntu sekretáriu jerál III), Hipolito Soares (adjuntu sekretáriu jerál IV) no Teodoru dos Reis (adjuntu sekretáriu jerál V).

Iha Kongresu Nasionál ne’e, Partidu KHUNTO fó mos pose bá estrutura konselleiru nasional hamutuk ema na’in-sanulu, Konsellu Fiskal, Jurizdisaun, Verifikasaun no Kontas hamutuk 11 no Finansas Partidu nian hamutuk ema na’in-tolu (30.

Prezidente Partidu KHUNTO,  Armanda Berta dos Santos husu bá estrutura atu kontinua iha kompromisu  hodi servisu hamutuk lori partidu KHUNTO bá oin no nia hein katak ho estrutura foun Partidu KHUNTO bele kontinua servisu makas bá vitória iha futuru.

“Bá oin ho estrutura foun ida bele servisu di’ak liután bá povu nia moris, tan ne’e presiza ita-nia servisu hamutuk hodi lori nasaun ne’e bá oin,” Armanda Berta dos Santos hateten.

Nia subliña Partidu KHUNTO antes atu to’o ohin loron hasoru dezafiu oin-oin, maibé nafatin eziste hodi luta bá povu nia moris di’ak no unidade nasionál.

Prezidente Partidu KHUNTO, Armanda Berta dos Santos. Foto/Elio dos Santos da Costa

“Bá konselleiru másimu no kongresista hotu nia konfiansa mai ami hodi servisu lori partidu bá oin, liu-liu atu haree bá eleisaun ne’ebé sei tuir iha tinan-lima,” nia tenik

Iha fatin hanesan, Sekretáriu Jerál Partidu KHUNTO, Ilídio Domingos de Araújo, hateten ho estrutura foun ne’ebé ohin eleitu hosi kongresista sira, sei kontinua nafatin servisu hamutuk ho estrutura anterior hodi lori partidu KHUNTO bá futuru.

“Ha’u bele hamriik ho kolega sira iha ne’e tanba mai hosi kongresista sira nia esforsu, tanba imi tomak nia matenek mak ita realiza kongresu nasionál ne’e no ikus mai tula mai ami nia kabaas responsabilidade atu ita hamutuk lori susesu ba ita nia partidu,” Ilídio Domingos de Araújo hateten.

Konselleiru Supremu Partidu KHUNTO, José dos Santos Naimori Bucar hateten partidu KHUNTO nia dezafiu sira hotu iha 2023, agora prepara an bá eleisaun sira ne’ebé sei mai iha tinan sira mai ne’e.

Nia afirma KHUNTO iha esperansa ida ho domin no haraik an hodi manan buat hotu no bele realiza kongresu nasionál hodi eleje estrutura founpPartidu nian bá períodu 2024-2028.

“Ita realiza kongresu hodi hili fila fali estrutura foun, ha’u agradese áa hotu-hotu ousi munisípiu 13  ho Atauru, imi fó fiar ba estrutura ne’ebé ohin imi rasik deside katak sira mak sai matadalan bá iha partidu KHUNTO,” José dos Santos Naimori Bucar hateten.

Konselleiru supremu  ne’e dezafia estrutura partidu KHUNTO atu kontinua servisu maka’as áa partidu no labele ta’uk atu halo buat loos hodi defende povu nia interese.

Partidu KHUNTO iha nia  filozofia rasik ne’ebé sai lema katak “Tane O lisan, Tane O rain no Tane O emar”.

Iha kongresu nasionál bá da-IV  ne’ebé hala’o iha Salaun Delta Nova ne’e, eis Sekretáriu Jerál Agostinho da Silva  no reprezenta partidu KHUNTO iha Parlamentu Nasionál (PN), Deputada Olinda Guterres la marka prezensa.

Jornalista: Vito Salvadór