Hatutan.com, (22 Abríl 2024), Díli—Parlamentu Nasionál (PN), hala’o ona diskusaun no votasaun iha jeneralidade, espesialidade no finál globál bá Proposta Lei 2ª alterasaun bá Lei n°8/2009, 15 de jullu kona-bá Comissão Anti Corrupção (CAC) ne’ebé ho karákter pedidu urjénsia hosi Governu iha tempu hirak liu bá, nune’e bele hakat bá eleisaun komisáriu CAC ho maioria absoluta.
Durante prossesu diskusaun no aprovasaun ne’e, bankada FRETILIN ho PLP la partisipa maibé kuorum iha deputadu na’in 37 mai hosi bankada CNRT, PD no KHUNTO, nune’e rezultadu votasaun jeneralidade Proposta Lei, 2ª alterasaun bá Lei n°8/2009, 15 de jullu kona-bá Comissão Anti Corrupção afavor 37 kontra zero (0) abstensaun zero (0), passa.
Lee Mós: Prezidente Repúblika Konkorda ho Alterasaun Lei CAC
“Rezultadu votasaun finál globál bá Proposta Lei, 2ª alterasaun Lei n°8/2009, 15 de jullu kona-bá Comissão Anti Corrupção, afavór 37, kontra zero (0), abstensaun zero (0). Nune’e, votasaun bá finál globálpassa,” Prezidente Parlamentu Nasionál, Maria Fernanda Lay hateten iha plenária, Segunda (22/04/2024).
Iha fatin hanesan, deputadu bankada KHUNTO Luis Roberto hateten, nia fó votu afavór bá Lei alterasaun CAC segunda vez tanba konsidera importante liu maka komisáriu CAC servisu imparsialidade.
“Importante liu maka ita nia funsionamentu instituisaun ne’ebé mak Estadu ne’e estabelese no nomós bá lideransa ne’ebé mak atu bá lidera tenke servisu imparsiál, hatudu nafatin profisionalizmu,” nia hateten.
Ministru Justisa, Sérgio Hornai haktuir, Governu liuhosi ninia espozisaun no motivu haree bá iha artigu 7 numeru 1 ne’ebé ko’alia kona-bá oinsá atu fó enfaze bá iha eleisaun komisáriu iha Parlamentu Nasionál liuliu proposta ne’ebé mai daudaun hosi Governu.
“Objetivu ka letra ida lori bá ita atu sees an hosi interpretasaun ne’ebé naruk no mós prolongada bá iha artigu anteriór bá Lei númeru 8/2009 ninian ho artigu ida-ne’e bele fó fatin atu nune’e bele fó fatin bá Parlamentu Nasionál hanesan segundu órgaun soberania hodi bele ezerse ninia direitu hodi bele halo eleisaun bá kargu titulár Parlamentu Nasionál ninian la nesesáriu ona atu lori 3/4 deputadu sira nian prezensa iha Parlamentu Nasionál. Maibé ita bele uza de’it medida maioria absoluta hodi nune’e bele halo eleisaun bá iha kargu titular Comissão Anti Corrupção CAC,” Sérgio Hornai hateten iha Plenária PN, Segunda (22/04/2024).
Jornalista Estajiária: Zita Menezes
