Posibilidade Governu Aprezenta Kandidatu Foun Komisáriu CAC

Hatutan.com, (23 Abríl 2024), Díli– Vise-Ministru Asuntu Parlamentár,  Áderito da Costa Hugo, informa proposta Lei, 2ª alterasaun bá Lei n°8/2009, 15 de jullu kona-bá Komisaun Anti-Korrupsaun (CAC siglá portugés), aprova  final global ona iha Parlamentu Nasionál iha loron 22 fulan-Abríl,  ho nune’e, Governu sei haree fali timoroan feto ka mane ne’ebé prenxe rekizitu hodi kandidatu  bá komisáriu CAC atu aprezenta bá Parlamentu Nasionál hodi hakat bá eleisaun.

Lee Mós: PN Aprova Projetu Alterasaun Lei CAC iha Finál Globál

Vise-Ministru Asuntu Parlamentár, Áderito da Costa Hugo. Foto/Tome da Silva

Tuir ninia andamentu, katak bainhira Lei ne’e iha nia mudansa aprova tiha iha Parlamentu Nasionál submete bá Komisaun A trata Asuntu Justisa no Lejislatura hodi halo redasaun finál molok submete bá Prezidente Repúblika atu promulga no públika iha Jornál da Repúblika.

“Depois promulga mak ita foin hatene tuir regra ne’e iha loron 30 nia laran depois lei ne’e entrada ein-vigór, Governu sei aprezenta kandidatu komisáriu iha loron 30 nia laran,” Adérito Hugo informa iha plenáriu PN,   Tersa (23/04/2024).

Nia afirma kandidatu Komisáriu ne’e Governu sei haree hikas timoroan ida, tanba kandidatu uluk Rui Pereira la avansa ona mak Governu mai ho alterasaun bá lei CAC.  Tan ne’e, ho alterasaun Lei ne’e Governu sei diskute fali para haree timoroan feto no mane ne’ebé prenxe rekizitu hodi  aprezenta mai Parlamentu Nasionál hodi bele halo eleisaun.

Vise-Ministru asuntu parlamentár seidauk bele halo pronúnsia bá kandidatu komisáriu foun nee nia identidade tanba ne’e kompeténsia Primeiru Ministru Kay Rala Xanana Gusmão nian.

Jornalista Estajiária:  Zita Menezes