Defeza & Seguransa
Tenente Jenerál Falur Mak Orienta Polísia Militár Asegura SEATOU iha Terrenu
Hatutan.com, (30 Abríl 2024), Díli-Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, klarifika katak nia rasik mak fó orientasaun’ bá Polísia Militár atu koloka nia membru asegura Sekretáriu Estadu Toponímia no Organizasaun Urbana (SEATOU), Germano Santa Brites Dias ho ekipa iha terrenu bainhira halo eviksaun bá komunidade sira ne’ebé utiliza espasu públiku no Estadu nia rai.
Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’. Foto/Elio dos Santos da Costa.
Tenente Jenerál Falur Rate Laek hato’o lia hirak ne’e hodi hatán bá preokupasaun públiku nian ne’ebé husu atu labele uza membru F-FDTL iha ámbitu aviksaun obrigatóriu hosi SEATOU tanba seguransa interna instituisaun Polisia Nasionál Timor-Leste (PNTL) mak responsabiliza.
“Ha’u hakarak hateten bá públiku tomak katak, ha’u nu’udár Xefe Estadu Maiór Jenerál F-FDTL nian ha’u apoiu inkondiosionalmente desizaun saida de’it maka Governu ida-ne’e halo, ami F-FDTL apoiu sein rezerva, tanba ne’e hakarak fó ami nia parabéns bá SEATOU ho nia ekipa apejar hetan difikuldade barak mas sira konsege halo mudansa prátika ruma iha ita-nia sidade laran. Parabéns no obrigadu,” Hatutan.com sira iha komunikadu imprensa, Tersa (30/04/2024).
Tenente Jenerál Falur Rate Laek esplika, misaun jerál Forsas Armadas nian mak hala’o servisu seguransa iha ámbitu sistema integradu no seguransa nasionál nnian, no ne’e sistema ida atu kolabora ho misaun protesaun sivíl, atividade ne’ebé halo ema haksolok no kontente tuir nesesidade bázika sira atu hadi’a ninia moris di’ak, misaun jenerétika ne’ebé instituisaun FALINTIL-FDTL halo.
Falur haktuir, iha estatutu Polísia Militár nian, garante seguransa bá militár sira, material militár nian no béns sira, apoiu Forsa Seguransa iha asaun kontrolu no distúrbiu sira, kuandu autoridade kompetente sira husu.
“Xefe Estadu Maior Jenerál autoriza mak foin sira bá purtantu membru Polísia Militár sira SEATOU ne’e hetan autorizasaun hosi ha’u no membru na’in-lima de’it mak iha ne’ebá,” Falur Rate Laek hateten.
Komandu F-FDTL mós hola ona desizaun katak, membru Polísia Militár hamutuk na’in-lima ne’e sei asegura SEATOU ho ninia ekipa to’o atividade eviksaun nian termina.
Jornalista: Rogério Pereira Cárceres