Bankada KHUNTO Husu Labele Limita Mídia Nia Knaar

Hatutan.com, (03 Maiu 2024), Díli– Membru Parlamentu Nasionál hosi Bankada KHUNTO, Luis Roberto husu entidade hotu atu respeita jornalista no mídia nia knaar no la bele iha intervensaun podér polítika iha independénsia mídia sira-nian.

Lee Mós: Conselho Imprensa La Tolera Intervensaun Podér Polítika iha Independénsia Editoriál

Membru PN hosi Bankada KHUNTO, Luis Roberto. Foto/Zita Menezes

Membru PN ne’e haktuir konstituisaun RDTL  artigu 40 ho 41 fó liberdade bá sidadaun hotu-hotu atu espresa sira nian hanoin no fó liberdade imprensa hodi hatutan informasaun ne’ebé mak adekuadu bá komunidade sira atu asesu bá kualkér informasaun ne’ebé relasiona ho dezenvolvimentu nasionál.

“Ami mós akompaña informasaun ida-ne’e, ita nia Sekretáriu Estadu Komunikasaun sosiál (SEKOMS), Expedito Dias Ximenes halo intervensaun bá iha independénsia redasaun RTTL,E.P nian ita haree bá hanesan atu limita fila-fali jornalista no mídia sira-nia liberdade,” Deputadu KHUNTO Luis Roberto haktuir bá Hatutan.com iha PN, Sesta (03/05/2024).

Nia haktuir bele fó formasaun maibé labele kesi-metin média nian liberdade hodi halo intervensaun bá aktu saida de’it independénsia sala redasaun mídia sira-nian no korajen nafatin bá iha mídia hotu-hotu atu nune’e bele nafatin halo sira nian servisu ho  profisionál nu’udár jornalista fó nafatin fó informasaun sira ne’ebé mak adekuadu atu nune’e sosiedade sira bele asesu nafatin bá informasaun.

“Nu’udár membru iha PN ami ejize nafatin bá iha SEKOMS atu hadi’a rekursu umanu internal iha jornalista ninian,  liuliu iha RTTL,E.P ho fasilidade depois fó mós kapasitasaun bá ita nia jornalista sira para sai profisionál liután hodi bele garante ita-nia kualidade produtu Jornalístika,” Deputadu Luis Roberto afirma.

Nia hatutan katak mídia  pillar importante iha nasaun demokrasia ida, Tanba ida-ne’e mak PN iha kometimentu boot hodi fó ajuda nafatin bá mídia sira liuhosi SEKOMS halo nusa para bele hadi’a mídia sira iha rai-laran  nia kualidade profisionál.

Lee Mós: Deskonfia, Intervensaun Podér Polítika iha Redasaun RTTL,E.P

Jornalista Estajiária: Zita Menezes