Hatutan.com, (07 Maiu 2024), Díli—Prezidente Repúblika (PR), José Ramos-Horta konkorda ho alterasaun Lei Comissão Anti Corrupção (CAC), tanba bele fasilita eleisaun bá Komissáriu ho de’it maioria simples, nune’e sei promulga iha tempu badak nia laran.
Ramos-Horta deklara konkorda tanba projetu alterasaun Lei númeru 6/VI(1ª) alterasaun daruak bá Lei númeru 8/2009, loron 15 fulan-Jullu, kona-bá lei CAC ne’ebé Parlamentu Nasionál (PN) haruka ona bá iha Prezidénsia Repúblika.
Lee Mós: Projetu Alterasaun Lei CAC Submete Ona bá Prezidente Repúblika
“Alterasaun Lei CAC se mai ona iha ha’u nia Gabinete, fila ha’u assina kedan, tanba ha’u koñese alterasaun ne’e. Ha’u akompaña la iha problema. Ha’u simu ho simu ha’u assina kedan tanba ha’u akompaña desde debate sira ne’e iha fulan sira ba kotuk,” Prezidente Repúblika hateten iha Timor Plaza, tersa (07/05/2024).
Xefe Estadu subliña, los duni alterasaun Lei CAC ne’e di’ak duni tanba eleisaun bá Komisáriu CAC ne’e bele de’it ho maioria simples.
Tui nia, demokrasia tenke funsionál, tenke operasionál no prátiku, bainhira Lei ida halo fali obstákulu, Xefe Estadu sujere di’ak liu muda tiha.
Antes ne’e Prezidente Parlamentu Nasionál (PPN), Maria Fernanda Lay informa katak Lei CAC haruka ona bá Prezidente Repúblika (PR), José Ramos-Horta, tanba Prezidente Repúblika foin mak fila mai hosi vizita servisu iha rai-liur no konserteza hein hodi promulga.
Iha loron 22 fulan-Abríl 2024, PN liu hosi diskusaun kona-bá Proposta Lei numeru 6/VI(1ª) alterasaun daruak bá Lei númeru 8/2009, loron 15 fulan-Jullu, kona-bá lei Comissão Anti Corrupção (CAC).
Jornalista: Vito Salvadór
