Saláriu Minimu $115 La Refleta Ona Povu Nia Nesesidade Bázika

Hatutan.com, (07 Maiu 2024), Díli– Bankada Parlamentár FRETILIN hato’o sira-nia deklarasaun polítika iha plenária,  Tersa (07/05/2024), hodi kestiona saláriu minimu iha Timor-Leste ne’ebé to’o ohin loron mantein ho $115.

Lee Mós: Hasa’e Saláriu Mínimu bá $150.00

Bankada FRETILIN konsidera saláriu minimu $115 ne’e la sufisiente bá nesesidade báziku povu nian tanba presu sasán iha merkadu ne’ebé kontinua sa’e.

Marsa iha Díli laran hodi komemora loron mundiál traballdór sira-nian, 01 fulan-Maiu 2024. Foto/Elio dos Santos da Costa

Membru PN hosi Bankada FRETILIN, du Antoninho Doutel Sarmento, hateten ho releta bá evolusaun ekonomia no sosial bá nasaun ida-ne’e nian, tinan bá tinan nesesidade merkaduria  sa’e bá beibeik tanba ne’e Bankada FRETILIN iha uma fukun Parlamentu Nasionál hakarak bolu atensaun bá Governu no empregadór sira atu konsidera traballadór Timoroan sira hodi regula no define saláriu minimu ida ne’ebé tuir situasaun ekonomia atuál iha Timor-Leste.

“Bankada FRETILIN mós preokupa ho saláriu minimu traballadór iha de’it $115 kada fulan, ne’e susar tebes atu sustenta ekonomia uma-kain ida nian, enkuantu  folin foos iha merkadu sa’e as no sasán bazikú seluk ne’ebé ho folin karun,” Deputadu Antoninho Doutel Sarmento iha hato’o deklarasaun polítika Bankada FRETILIN  nian.

Nia haktuir saláriu minimu $150 kada fulan ne’ebé konsellu nasional traballadór propoin ona bá Governu ne’ebá bazeia bá peskiza ne’ebé halo iha tinan 2018 ne’ebé iha momentu ne’ebá presu merkadu la’o normal hela

Deklarasaun Bankada FRETILIN ne’e mós haktuir katak iróniku liu mak IX Governu liu husi konsellu ministru rejeita proposta husi Konsellu Nasionál Traballadór ne’ebé husu atu hasa’e saláriu minimu traballadór nian husi $115 bá $150 kada fulan hodi bele atende bá nesesidade uma-laran nian, maibé iha reuniaun iha Konsellu Ministru nian, Membru Governu sira rejeita totál proposta ne’e hodi dehan tan, hasa’e saláriu minimu bá traballadór ne’e la nesesáriu bá IX Governu.

Tuir Lei traballu Nú.4/2012 lei traballadór nian kada tinan  konsellu nasionál traballadór tenke halo revizaun bá saláriu minimu atu adapta bá dinámiku ekonomia nasaun nian.

Vise-Ministru asuntu Parlamentár, Adérito Hugo da Costa, haktuir IX Governu liuhosi Konsellu Ministru hetan aprezentasaun inisiativa husi SEFOPE inisiativa ida-ne’e devolve ou konsiderasaun bá públiku, konsellu nasionál traballadór tau konsiderasaun bá iha pontu situasaun balu ne’ebé mak iha planu OJE 2024 iha progresu implementasaun.

“IX Governu sei halo analiza bá devolve SEFOPE ninian atu kontinua nafatin ho inisiativa ida-ne’e, maibé ita sei implementa iha momentu oportunu para depois labele fó afeta bá planu OJE ne’ebé iha progresu hela no deklarasaun polítika Bankada FRETILIN ne’ebé mak espresa di’ak tebes katak nivel saláriu ida $115 ne’e presiza ona atualiza ho situasaun atuál kustu  vida nian,” Adérito Hugo hateten.

Jornalista Estajiária: Zita  Menezes