Estrada iha Afaloicai-Uatulari Grave

Hatutan.com, (13 Maiu 2024), Díli— Deputadu Bankada CNRT iha Parlamentu Nasionál (PN), Anacleto Freitas preokupa ho kondisaun estrada iha Suku Afaloicai, Postu-Administrativu Uatulari, Munisípiu Viqueque ne’ebé daudaun grave no difikulta tebes movimentu populasaun nian.

Kondisaun estrada iha área aldeia Caitau, suku Afaloicai, postu administrativu Uatulari. Foto Facebook Deonizio Magalhães.

Deputadu ne’e observas direta katak, estrada diresaun postu-administrativu Uatulari antigu hahú kedan hosi mota Bebui to’o Afaloicai, Nunumalau Babulo no Iralere ne’ebé populasaun sira assesu ho kondisaun grave.

Lee Mós: Povu Covalima Presiza Tebes Estrada

Situasaun ne’e deputadu Anacleto Freitas levanta iha plenária Parlamentu Nasionál, segunda (13/05/2024).

Nia mós simu direta preokupasaun povu nian katak, durante ne’e transporte públiku susar tebes atu movimentu hodi transporta produtu lokál mai merkadu inklui difikulta ambulánsia hodi transporta pasiente hosi sentru saúde Uatulari.

Reprezentante povu ne’e husu bá Ministériu Obras Publika (MOP) atu tau iha konsiderasaun nune’e bele tulun populasaun iha área rural.

Kona-bá preokupasaun ne’e, Vise-Ministru Asuntu Parlamentár, Adérito Hugo da Costa hateten, estrada sira iha munisípiu no suku sira ne’e sei hadi’a uza orsamentu ne’ebé aloka bá munisípiu nian.

Tánba ne’e, estrada sira ne’ebé kategoria munisípiu no suku ninian, orsamentu iha munisípiu mak implementa, la’ós mai to’o nasionál.

“Ida-ne’e sei forte liu tán iha OJE tinan 2025 ne’ebé ninia elaborasaun la’o hela. Orsamentu iha munisípiu sei aumenta barak liu tán bá despeza sira iha munisípiu rasik,” nia hateten.

Nia dehan, Prezidente Autóridade Munisípiu sira mak sei aprezenta orsamentu ne’ebé sei elevadu iha tinan oin nune’e atendimentu bá povu dezentraliza bá kra’ik hotu.

Jornalista Estajiária: Zita Menezes