Figura
Governu Nomeia Agio Pereira Hanesan Interlokutór iha Diskusaun Greater Sunrise
Hatutan.com, (16 Maiu 2024), Díli–Primeiru-Ministru (PM), Xanana Gusmão nomeia Ministru Prezidénsia Konsellu Ministrus, Hermenegildo “Agio” Pereira hanesan interlokutór iha diskusaun ho Steve Bracks AC nu’udár reprezentante espesiál Austrália nian kona-bá dezenvolvimentu Greater Sunrise.
Lee Mós: Deklarasaun Polítika Bankada FRETILIN: Tanbasá TL Seidauk Bele Manan Greater Sunrise
Ministru Prezidénsia Konsellu Ministru (MPKM), Hermenegildo “Agio” Pereira. Foto/dok
Governu da-9 ne’e pozisiona dezenvolvimentu Greater Sunrise hanesan prioridade estratéjika ida bá Timor-Leste atu bele harii bazes ne’ebé metin ba ekonomia ida ne’ebé sustentável no fó benefísius ho oportunidades sosiais ba povu timor tomak.
Sita hosi komunikadu imprensa ne’ebé Hatutan.com asesu, Kinta (16/05/2025), Ministru Petróleu no Rekursus Minerais, Francisco da Costa Monteiro, sei lidera traballu ne’e liuhusi kooperasaun ho ninia omóloga Australiana, Madeleine King, Ministra Rekursus, tuir kuadru regulamentár ne’ebé estabelese iha Tratadu kona-bá Fronteira Marítima entre Timor-Leste ho Austrália.
Ministru Agio Pereira sei hala’o knaar hanesan interlokutór hodi halo diskusaun regular ho Steve Bracks no sai hanesan kanál (mata-dalan) bá lideransa Timor nia iha Greater Sunrise.
Hili duni Ministru Agio Pereira atu hala’o knaar ne’e tanba nia papél hanesan Ajente Timor-Leste nian iha prosesu Konsiliasaun Obrigatória husi Nasoins Unidas ne’ebé hamosu Tratadu Fronteira Marítima, no mós nia kompreensaun ne’ebé kle’an tebes kona-ba Sistema polítiku Austrália nian.
Nu’udar interlokutór, Ministru Agio Pereira sei tulun fasilita komunikasaun, hato’o informasaun no harii entendimentu ne’ebé di’ak entre Governu rua.
Governu Timor-Leste sente laran haksolok ho progresu hirak-ne’ebé halo daudaun ona iha dezenvolvimentu Greater Sunrise no ho nomeasaun interlokutór ida ne’ebé sei dezempeña papél di’ak iha fasilitasaun projetu kritíku ne’e.
Jornalista : Leopoldina de Carvalho