UPF Prende Kombustivel Litru 245 iha Memo-Maliana

Hatutan.com, (17 Maiu 2024), Díli-Polísia Nasionál Timor-Leste (PNTL) husi Unidade Patrullamentu Fronteira (UPF) prende  kombustivel ho kuantidade litru 245 iha área Memo, Postu Administrativu Maliana, Munisipiu Bobonaro.

Lee Mós: UPF Halo Apreensaun bá Na’an Maran Ilegál, Mákina Ró ho Ró Ne’ebé Transporta Objetu Krime

Evidénsia sira ne’ebé asegura hela hodi submete bá prosesu iha Tribunál. Foto/Rogério Pereira Cárceres

Evidénsia hirak ne’e halo apreensaun, durante atividade operasaun ka patrulla la’o ne’ebé hala’o entre UPF ho membru servisu sekreta sira iha área fronteira terrestre nian. maske nune’e, UPF la konsege kaptura suspeitu sira tanba halai lakon hotu.

Ho apreensaun ne’e, komandu UPF iha Maliana, orienta kedas membru sira hodi transporta mai iha Kuartel jerál Komandu PNTL, iha Caicoli, no submete bá ekipa Departamentu Investigasaun Kriminál (DIK), hodi halo identifikasaun no investigasaun kontinua. 

“Iha loron 17 fulan-Maiu 2024, oras 03:15 otl, membru UPF, Postu Memo hamutuk ho Servisu Sekreta sira, prende evidénsia ilegál mak hanesan Mina Gazoel masa 35 liter, masa (3) ho Gazolina 35 liter, masa (4) total Gazoel ho Gazolina litru  245. Maibé, autór sira ka na’in bá sasan hirak ne’e halai lakon,” autoridade Polísia  informa bá Hatutan.com, iha Kuartel Jerál PNTL-Caicoli, Dili, Sesta (17/05/2024).

Hafoin halo tiha identifikasaun, ekipa DIK halo enkamiñasaun bá prosesu ne’e, no transporta kedan evidénsia sira bá iha Ministériu Públiku (MP) hodi prosesa tuir lei.

Iha lei Kódigu Penál Timor-Leste, Artigu 316 ko’alia kona-bá Kontrabandu, iha alineda dahuluk esplika katak, sé maka importa ka esporta rikusoin ka merkadória sira la lori liuhosi Alfándega sira ka kontrolu pasájen obrigatória seluk tama ka sai rikusoin ka merkadória sira hosi territóriu Timór-Leste nian  sei kondena ho pena prizaun hosi tinan-rua (2) to’o  tinan-neen (6) ka  multa.

Iha mós alinea daruak hosi artigu ne’e nian, esplika kona-bá valór hosi rikusoin ka merkadória sira superiór hosi $10.000 ka enkuantu ema ne’e prátika faktu sira ne’ebé hakerek tiha iha númeru anteriór ho forma baibain maka sei kondena ho pena prizaun hosi tinan-rua (2) to’o  tinan-ualu (8).

Jornalista: Rogério Pereira Cárceres