Grupu Traballu Reforma Justisa Submete Ona Relatóriu Servisu bá Primeiru-Ministru

Hatutan.com, (20 Maiu 2024), Díli- Ministru Justisa (MJ), Sérgio de Jesus Fernandes da Costa Hornai hateten Grupu Traballu Reforsa Setór Justisa submete ona relatóriu bá iha Primeiru-Ministru Kay Rala Xanana Gusmão atu lori bá diskute iha Konsellu Ministru no bele hetan apresiasaun no rekomendasaun molok implementa.

Lee Mós: Reforma Estrutura Lei Ne’ebé La Kompativel Bá PCIC no Iha Ona Relatóriu Reforma Justisa

Ministru Justisa, Sérgio de Jesus Fernandes da Costa Hornai. Foto/Elio dos Santos da Costa

“Konserteza ekipa nia servisu ida mak atu halo submisaun relatóriu bá iha Xefe Governu depois konklui servisu. Husi ne’ebá Xefe Governu sei haree, halo apresiasaun ida kle’an no bainhira  nesesáriu Xefe Governu sei hato’o bá iha Konsellu Ministru no Konsellu Ministru rekomenda bá iha instituisaun relevante para atu halo implementasaun,” Ministru Justisa Sérgio de Jesus Fernandes da Costa Hornai bá jornalista sira iha Palásiu Prezidensiál, Segunda (20/05/2025).

Ministru Justisa hatutan relatóriu haruka ona ba Primeiru-Ministru Kay Rala Xanana Gusmão tanba ne’e iha rekomendasaun espesiál ruma ka lae, hein pronunsiamentu husi Primeiru-Ministru iha Konsellu Ministru tanba sei ba hetan mos apresiasaun iha ne’ebá.

Antes ne’e, Primeiru-Ministru (PM), Kay Rala Xanana Gusmão liu hosi Despaixu númeru 03/PM/VIII/2023 kona-bá kriasaun grupu traballu bá reforma Seitór Justisa, nomeia Eis Ministra Justisa, Lúcia Maria Brandão Freitas Lobato hanesan koordenadora.

Iha loron 05 fulan-novembru 2023, Koordenadora Grupu Traballu Reforma Justisa, Lúcia Lobato hateten seitór Justisa iha rai-laran dezorientadu no moras todan, nune’e tuir planu iha fulan Fevereiru tinan 2024 ekipa sei publika relatóriu Reforma Justisa Timor-Leste (TL) nian.

Jornalista: Vito Salvadór