Neo-Maira Lansa Múzika Da-huluk ho Títulu “Ha’u-Nia Mehi”

Hatutan.com, (24 Maiu 2024), Díli—Neo Francisco Limeco da Silva Gusmão ho Maira Peregrina Amelia Limeco da Silva Gusmão ho naran estimadu Neo ho Maira lansa múzika dahuluk ho títulu “Ha’u-nia mehi” oferese espesialmente bá labarik hotu-hotu iha Timor-Leste (TL).

Neo Francisco Limeco da Silva Gusmão ho Maira Peregrina Amelia Limeco da Silva Gusmão ho naran estimadu Neo ho Maira lansa múzika dahuluk ho títulu “Ha’u-nia mehi” oferese espesialmente bá labarik hotu-hotu iha Timor-Leste (TL) iha Cineplex, Timor Plaza, sesta (24/05/2024). Foto: Tomé da Silva.

Iha sermónia lansamentu ne’e, Ministru Komérsiu no Indústria (MKI), Filipus Nino Pereira hateten, múzika hanesan media ida atu transmite bá ema bainhira akompaña ka rona iha kualkér tempu.

Lee Mós: Múzika Shadow Nu’udár Espresaun Domin Bepi Nian bá Aman-Inan

Tanba ne’e, Ministru orgullu tebtebes iha iha momentu espesiál ida-ne’e tanba Neo ho Maira maski idade sei kiik maibé bele lansa ona sira-nia múzika ka album da-huluk nian ne’ebé oferese espesialmente bá ki’ik oan sira.

“Ita rekoñese katak, múzika bá ki’ik-oan sira, bá ita-nia oan sira iha Timor-Leste sei menus tebes. Tanba ne’e, ita fiar katak hahú ho sira na’in-rua bá oin sei iha tán Neo ho Maira nia kolega sira seluk halo tán múzika,” Nino Pereira hateten iha Cineplex, Timor Plaza, sesta (24/05/2024).

Nino Pereira konsidera Neo ho Maira hatudu ona ezemplu di’ak no hatudu talentu ida ne’ebé mak di’ak tebes hodi kontribui bá mundu múzika, tanba liu hosi múzika ne’e hanesan media ida bá edukasaun oinsa bele hariku liu tán kreatividade, matenek no haburas nafatin ida-ne’e sai hanesan produsaun ida hahú kuda bá ki’ik oan sira.

Serimónia lansamentu múzika dahuluk hosi Neo Francisco Limeco da Silva Gusmão ho Maira Peregrina Amelia Limeco da Silva Gusmão ho títulu “Ha’u-nia mehi” oferese espesialmente bá labarik hotu-hotu iha Timor-Leste (TL) iha Cineplex, Timor Plaza, sesta (24/05/2024). Foto: Tomé da Silva.

Ministru ne’e apresia bá saida mak Neo ho Maira halo ona no mós bá inan aman sira ne’ebé sempre lori oan sira bá saida mak labarik sira hakarak, tanba atu hatudu performa iha palku leten, iha ema barak nia oin ne’e la’ós katak labarik hotu-hotu bele halo maibé ida-ne’e tanba iha orientasaun ida ne’ebé mak di’ak hosi inan aman.

Iha fatin hanesan aman hosi Neo ho Maira, Ruben da Silva Gusmão hateten, lansamentu múzika ida-ne’e nu’udár debt single bá Neo ho Maira kona-bá esperansa no pás.

“Ami halo kolaborasaun ho Timor Furak entertainment, sira ajuda barak atu oinsá realiza lansamentu ida ne’e. Múzika ida-ne’e ko’alia kona-bá futuru esperansa bá labarik nian atu fo ezemplu bá labarik sira katak, futuru Timor-Leste nian ne’e iha sira-nia kabas no sira iha mehi boot atu foti ita-nia rai,” Ruben da Silva Gusmão hateten.

Ruben da Silva Gusmão  konsidera múzika ne’e hanesan motivasaun atu enkoraza alin ki’ik oan sira atu hateke ba oin. Bainhira sira iha talentu, entaun sira tenki servisu makas liu tán atu promove nafatin talentu hirak ne’e liu hosi prosesu formál no mós sira seluk tán nune’e talentu ne’e labele iha espasu atu husik liu iha momentu ida.

Neo ho Maira foto hamutuk ho Ministru Nino Pereira iha serimónia lansamentu múzika dahuluk ho títulu “Ha’u-nia mehi” oferese espesialmente bá labarik hotu-hotu iha Timor-Leste (TL) iha Cineplex, Timor Plaza, sesta (24/05/2024). Foto: Tomé da Silva.

Nu’udár aman senti kontenti  tanba ida-ne’e primeira vés bá inan aman katak liu hosi inan aman nia mehi hakarak oan sira atu halo buat ruma iha mundu ida-ne’e mak ikus mai vídio clip ne’e realiza no parte hotu-hotu bele suporta ho másimu.

“Ami kontenti tebes tanba sira suporta. Katak, sira hadomi ami, sira enkoraza ami liuliu bá futuru labarik sira nian,” nia espresa sentimentu orgullu.

Múzika ne’e prodús hahú hosi kedan kompozisaun to’o mai lansamentu ne’e durante fulan tolu to’o haat, sira sempre treinu no la fásil maibé tenki repete no repete tanba labarik sira idade labrik sei kiik maibé ikus mai sai realidade.

Agora daudaun Neo tinan 10 no Maira tinan 9, sira iha tán múzika rua ne’ebé halo hotu ona ho títulu “Dame no Pás” hein katak iha fulan rua ka tolu oin mai sei partilla tán bá públiku.

Hanesan aman, Ruben husu bá inan-aman sira karik iha mehi bá labarik sira labele toba de’it, maibé tenki hader buka esforsu bá saida de’it tanba arte ne’e bainhira explora liu hosi meius oioin ne’ebé mak iha, ema sempre akompaña.

Ruben da Silva Gusmão.

“Tanba agora daudaun iha média dijitál oioin haruka labarik sira bele aprende iha telefone liu hosi YouTube hanesan múzika, karaoke no iha seluk tán. Iha aplikasaun barak mak alin sira bele explora sira nia telentu no mós tenki suporta nafatin sira,” nia enkoraza.

Husu bá Guvernu liuliu parte relevante sira atu haree ka tau-matan bá labarik sira ne’ebé mak iha talentu, promove nafatin sira hodi bele dezenvolve rai Timor Leste ba oin.

Inan-aman hosi Neo ho Maira mós agradese bá patrosinadór sira mak hanesan kompañia Stak King Unip.Lda, Aitula Lda, Li Cruz Unip Lda, Three Horses Unip., Lda no mós Timor Plaza, inklui Timor Traz mak halo shooting iha senáriu haat iha uma, eskola, estúdiu Dom Bosco, estúdiu EJX record no Hera.

Jornalista Estajiáriu:  Lázaro Pereira Quefi